Sanikolas i su pietnan ya ta riba barku kaba rumbo pa Kòrsou. Fundashon Pa Nos Muchanan, e aña akí pa di 10 biaha konsekutivo, ta enkargá ku organisahon di e evento grandi akí. Un biaha mas komersio i diferente organisahon a sòru pa e fiesta dushi di grandi i chikí ta posibel. Nos no por keda sin gradisínan nan pa esaki. E aña aki un biaha mas MCB i Lito, Hucor ku su restorantnan KFC, Subway I Pizza Hut, Tele Curacao nos planta nashonal i CPA/KTK pa un yegada safe, huntu ku Sentro komersial Sambil, Curoil, BAB, Kusters i Selikor i tambe Auto City, Ennia, PSB bank, Fundashon Lus i speransa, Lovers, WTC, Fraal Import & Export, The Trader, Hotel Howard Johnson, Sedreko, FDDk, PWC i Kuerpo polisial ta esnan ku lo sòru pa e fiesta di pueblo kompletamente gratis akí por tuma lugá. E dia lo kuminsá ku entrada den haf di Sanikolas i su pietnan pa 9or di mainta i na mes momentu e parti ofisial tambe ta kuminsá riba Plasa Brion. Aki e ganadó di Curastars pa loke ta kanto Sophi Torres lo interpretá himno di Kòrsou. Despues lo sigui ku show di D’art PM huntu ku kantante nan di e CD di Strea chikí pa Sanikolas. Miéntras  tantu e parada di Sanikolas riba su kabai blanku lo sali for di Mattheywerf direkshon di Plasa Brion. Riba plasa Brion lo tin un dushi show di interaktivó ku Sanikolas i su pietnan huntu ku un tremendo Brassband. E aña aki Sanikolas a skohé pietjesnan di JDR entertainment, Pietjesnan alegre i DCAt huntu ku JDR Brassband bou di direkshon di Best Choice production pa prepará e show pa nos muchanan. Pa loke ta e afther show e aña aki ta e formashon di hóbennan “Twins” lo sòru pa e ambiente Despues di e presentashondi Sanikolas riba Plasa Brion lo tin un parada ku lo krusa brug i pasa den Breedestraat. Despues Sanikolas i su pietnan lo drenta e diferente vehikulónan direkshon pa KFC na Sta. Maria. Ei lo tin ambiente ku e pietnan parti pafó i parti paden tur mucha tin chèns pa saka potrèt ku Sanikolas, esaki for di 12.45. Pa mas atardi, esta 3or, Sanikolas i su Pietnan lo ta na Parke Tropikal. Nos tur sa ku Parke Tropikal ta hasiendo esfuersonan masha grandi pa e parke akí por bira un sentro di dibertishon pa grandi i chikí, p’esei di e forma akí Fundashon pa nos muchanan ta brinda Parke tropikal e oportunidat ku pa medio di e aktividat akí nan por yega na algu di fondo pa por logra nan meta nan.
Pa mitar di 5, Sanikolas huntu ku tur su pietnan lo yega Sentro komersial Sambil. Akí un biaha mas tur mucha ta bonbiní pa disfrutá di un dushi fiesta di Sanikolas, huntu ku e diferente ganadónan di Curastars Strea Chikí 2016. E presentashon na Sambil lo bai ta un transmishon live di Tele Curacao tambe. Pues e aña akí un biaha mas, Sanikolas lo bishitá diferente sitio rònt Kòrsou pa duna tur mucha chèns pa pasa un ratu kontentu ku Sanikolas riba su dia di yegada.