Djadumingu 4 òktober den kuadro di dia di animal

WILLEMSTAD – Djadumingu dia 4 di òktober sentro di kompra Sambil pa gran parti tabata dediká na Dia Mundial di Animal. Esei tabata konforme e soño di señora Sarah Pinedo-Volders, esta ku e animalnan por konta ku mihó trato. E mes tabata e wéspet di honor djadumingu ku a uni vários organisashon pa presentá ku a e públiko grandi den Sambil nan mensahe na fabor di e animalnan.

Dia 1 di yüli último señora Pinedo a gana e premio públiko mas haltu ku su ekspreshon ku Kòrsou ta un paraiso, pero na mes momento e ta prekupá pa e grupo grandi di bestia ku niun hende no ta bira wak mes. So soño ta pa tur habitante di Kòrsou trata nan bestianan komo kriatura bibu, di moda ku dimes e kantidat grandi di kachó i otro animal di kaya na Kòrsou ta disparsé. Na e okashon ei e direktor general di Sambil Jonathan Cohen a primintí ku nan lo hasi loke nan por pa yuda realisá e soñonan ganador, i asina Sambil a kumpli.

Adopshon

Na inisio di e dia eksitoso i bon bishitá tabata toka honor na señora Pinedo pa introdusí e organisashonnan ku a kolaborá ku e enkuentro aki, manera fundashon Kuido di Animal Kòrsou ku ta su 65 añanan, I-Animal, Carf, fundashon Dierenhulp, Hadoc, Feed Friends Foundation, ‘Rijdende Hondenwasser’ i veterinario Gregory Vinck. Tur e organisashonnan aki a duna informashon tokante nan aktividatnan na fabor di e populashon di animal. Kuido di Animal a kana rònt tambe ku nan buzon pa kolektá. E aktividatnan a kuminsá 12 or i a sigui te 5 or di atardi. Tabatin ademas un kòntèst di klùr, un sekshon di saka potrèt, blas spesial, pinta kara i deskuento riba asesorio pa animal. E públiko tabatin atenshon mayó pa e kachó i pushinan chikitu ku tabata kla pa hende por adoptá. Pa vários di e animalnan hóben aki a logra haña un kas apropiá.