WILLEMSTAD – Anke trabou di limpiesa no ta tarea primordial di e sentro di kompra, Sambil Kòrsou ta sinti’é ligá hopi ku destino di su bisiñanan di Veeris en Paradijs. Den bon kordinashon ku e asosiashon di bario di Veeris a uni forsa pa un limpiesa profundo di e bario bastante grandi aki. Esaki ta un promé paso pa halsa nivel di bida den e bario aki ku a deteriorá bastante. Ku uso di material pisá i danki na un grupo di voluntario, entre nan habitantenan di bario i kolaboradornan di Sambil, den e dianan tras di lomba a bolbe limpia un parti di e bario.

Pa duna un idea di e embergadura di e trabounan aki: na total a yena 50 trùk grandi ku un peso total kalkulá na 500 tonelada, loke a saka na sushedat for di e bario. Esei ta djis e resultado di e di dos parti di fase 1 den kuadro di un plan di limpiesa – a plania mas fase. Fase 1 ta kla pa 90%.

Lo tabata trabou di pia di palu si a permití pa laga basha sushi atrobe den e zonanan ku a kaba di limpia. Pa stimulá e habitantenan pero tambe tur otro hende ku sa frekuentá Veeris i Paradijs pa tene e bario limpi, Sambil huntu ku e asosiashon di bario a laga pone bòrchi ku mensahenan bon i raspá. Dios sa ku tin otro kompania i bario ku tambe por uni di un forma similar pa pokopoko duna Kòrsou un imágen muchu mas limpi atrobe.