WILLEMSTAD – Sentro komersial Sambil Curaçao a lansa dos kampaña bou di e título ‘Dream for Curaçao’. Atraves di un app riba facebook.com/sambilcuracao kada ken na Kòrsou por duna un ekspreshon di su soño pa un mihó Kòrsou e próksimo 3 pa 5 añanan. Nan tin te dia 26 di yüni pa entregá esaki. Dia 28 di yüni ta anunsiá e ganadónan. E di dos kampaña ta eksklusivamente pa skolnan básiko lokal i nan alumnonan. Ta enkurashá nan pa ekspresá nan soño pa futuro di Kòrsou den un dibuho ku un splikashon. Kada skol ta skohe su mes mihó soño ku mester bai kompañá ku argumentashon den un relato i ku un lema, ku e skol mester manda pa kidsofcuracao@sambil.cw. E skolnan tin te dia 10 di mei pa entregá nan soño ganadó pa despues por vota te dia 15 di mei pa e dibuho mas gustá di e diferente skolnan. Dia 23 di mei lo anunsiá e ganadónan di e kampaña di skolnan. Tin premio total na balor di mas ku 35.000 florin pa e dos kampañanan i ta enserá bale tambe te na 7500 florin, tarheta pa pelíkula, etc. Na e sinku skolnan ku ta sali komo mihó den e kampaña aki, Sambil ta ofresé pa laga pinta e soño di e alumno ganadó na man riba un muraya na skol. E mural di e ganadó di kada skol su intenshon ta pa sigui kòrda e alumnonan ku soñonan por materialisá i ku nos tur mester traha na e Kòrsou di futuro. Ademas, e skolnan por gana donashon di Sambil pa kumpra material altamente nesesario, pa trabou di drechamentu i pa renovashon, òf pa finansiá beka. Sambil ta apoyá alumnonan individual tambe pa entregá nan soño na kidsofcuracao@sambil.cw si nan skol no ta partisipá. Sambil, su partnernan i otro organisashonnan lokal lo koperá pa realisá e soñonan ganadó i pa uni forsa pa un futuro próspero i eksitoso pa tur hende.