Fundashon JAG awe 17 di òktober a tene su promé rueda di prensa rumbo pa e di 50 edishon di Karnaval na 2020.
Moderador Angelo Virginie a yama tur miembo di prensa bon biní i a pasa palabra pa Juni Aniceta presidente di Fundashon JAG.

Juni Aniceta a ekspresá su gratitut na tur medio di komunikashon ku a hasi akto di presensia i a pasa pa aklará e informashonnan eroneo ku tabata sirkulando riba medionan sosial último dianan.
Juni Aniceta ta enfatisá un biaha mas ku Fundashon JAG a responsabilisá fondonan ku e fundashon a risibí debídamente konforme palabrashon ku Sektor di Kultura i Deporte.

Sra. Lizette Sambo-Velder a splika ku Fundashon JAG a entregá su relato finansiero debidamente i  mirando ku esaki ta mustra ku e subsidio a wordu bon manehá, su sektor a konsehá minister di Enseñansa, Siensia, Kultura i Deporte pa un biaha mas pone e enkargo pa organisá karnaval den man di Fundashon JAG. Seguidamente sra. Sambo a duna un splikashon amplio tokante e  “subsidieverordening” ku ta duna e posibilidat pa desvía for di un destaho públiko. Esaki sigur no ta deskonosí den Gobiernu.
Tambe sra. Sambo-Velder a duna informashon di e plataforma ku a keda instalá ku e meta pa pone forsa,  energia huntu i tur nanishi den mesun direkshon pa engrandesé nos fiesta kultural. Dentro di e plataforma aki tur puntonan ku ta di atenshon ta keda diskutí i konhuntamente ta formulá solushon. E plataforma ta konsistí di ; AMAK, Fundashon JAG, CCGG, AGKK, Sektor di Kultura, Fundashon Karnaval Banda Bou.
Finalmente sra. Sambo-Velder ta pidi tur hende pa ban huntu ku positivismo pa selebrá e di 50 edishon di Karnaval di Kòrsou.

Seguidamente Juni Aniceta a pasa pa desvelá e logo pa Kanaval 2020  i a repasá e kalender di karnaval 2020.
E “highlightnan” ta:

• Dia 3 januari 2020; apertura di karnaval ku un jump up ku ta sali for di Waaigat,
  pasa den Pietermaai, Penstraat i bai terminá den festival di SUBT;
  
  
• Dia 4 januari 2020; Curacao Carnival Village ku konsiertonan di Krosfyah, Burning Flames i Kevin Lyttle;
  
  
• Dia 6 februari 2020; Eksposishon i konferensia Karnaval Kòrsou 50 ;
  
  
• Dia 7 februari 2020; Kings and Queens night kaminda ta duna homenahe na Reyna, Prins i Panchonan di e 50 añanan;
  
  
• Dia 20 februari 2020; kompetensia koreografía pa gruponan di tiner;

Finalmente a anunsiá e Baluarte i Pilar pa karnaval 2020, kendenan ta señor Stanley Ignacio i CTB.