Minister dr. Alex Schwengle a cende luznan di Pasco

ORANJESTAD, Aruba – November 2015: E ta un di e rotondenan di mas grandi y mas uza riba nos isla. Tur e mas di 1 miyon turistanan cu ta yega nos isla anualmente ta pasa den dje, mescos cu ta mayoria di esunnan bibando pariba di brug. E rotonde dilanti Aeropuerto awor ta den ambiente di fin di aña, despues cu Minister dr. Alex Schwengle a cende e luznan hunto cu gerencia di Aruba Airport Authority N.V., patrocinado di e decoracionnan y luznan.

Cu e bunita gesto aki, Aruba Airport Authority hunto cu Bo Bario ta duna bek na comunidad, hincando henter e pueblo den ambiente di Pasco y Aña Nobo. E ta un tradicion di e ultimo añanan, esta decoracion di e rotondenan, cu tur aña ta creciendo mas y birando mas y mas luhoso, creativo y bunita.

Minister dr. Alex Schwengle a enfoca riba e temporada di paz, di reflexion, di duna mas cu ta pidi y di convivencia pa cu otronan. E mandatario, para na e rotonde dilanti nos Aeropuerto a haci un apelacion riba tur automobilista pa bay mas trankilo den trafico, sea mas cortes y pa tin pasenshi. Corda cu e dianan aki lo ta druk, pues sali mas trempan y corda cu tur bo sernan keri na cas ta spera ansioso bek riba Bo.