E di sinku Rotary Walking Dinner den Pietermaai ku 16 restorant  i mas ku 500 invitado ta un éksito grandi. A rekoudá sigur 44.000 florin pa e bon kousa ku e aña akí ta “Literacy”. Den pensamentu di Rotary lesamentu ta un kondishon básiko pa pas. Rotary, den koperashon ku diferente otro inisiativa, ta bai hasi esfuerso pa mehorá e kolekshon di buki di lesa na skolnan  básiko den tur bario. Meta di e empeño akí ta pa stimulá lesamentu serka hóbennan. Lesamentu ta dushi i ta bon pa desaroyo personal.

2 aña pasá e bon kousa tabata kalkulashon i a sostené Fundashon Tur Ta Konta den esaki. Aña pasá e fondo rekoudá tabata e base pa atkisishon di un aparato di mamografia 3D nobo pa Fundashon Prevenshon, ku resientemente a habri e Prevention Center nobo tambe.

Durante e spich di apertura Barbara Halabi di Johan van Walbeeckschool a konta di nan biblioteka nobo, ku a kristalisá entre otro ku sosten di Rotary Club Willemstad. Tambe el a konta kon e eksperiensha di lesamentu di e muchanan a mehorá. Durante e anochi e artistanan hóben di Drazans tabata presentá diferente teksto  for di buki di mucha.

16 tremendo restorant a sostené Rotary Walking Dinner, i di e manera akí a kontribuí di un manera bunita na desaroyo di hóbennan. Tambe tabatin koperashon di I-Design, Tramm, Radio Hoyer, APC, Ixora, Tovari, Licores Maduro, Tibbaa, Drazans, la  Vie en Rose i Bos di hubentut ku nan security bike team.