Siman pasá durante e kongreso internashonal di Rotary na Hamburg, a otorgá na presidente di Rotary Club Willemstad Benno van Leeuwen e kondekorashon honorabel 100% Paul Harris Fellow Club. Presidente Internashonal di Rotary Barry Rassin a deskribí e státùs akí komo un logro importante pa Kòrsou. Rotary ta un organisashon ku for di 1917 ta traha basá riba integridat, liderazgo, diversidat, amor pa próhimo i servisio. Mundialmente Rotary ta pone fondo, konosementu, abilidat i integridat na disposishon, di manera ku esakinan por tin influensha positivo riba e tópikonan ku ta pidi atenshon den komunidat.

E fundadó di Rotary, Paul Harris, a funda Rotary saliendo for di un pensamentu di kombiná negoshi ku amistat. Pero pa un service club ta fuerte mester di mas ku esei, i p’esei a bai enfoká riba e parti di bon kousa. E konsepto a bira un eksito i aktualmente tin 34.000 klup di Rotary den 165 pais i huntu nan tin mas ku 1.22 mion miembro. Rotarianonan ta sostené proyektonan di diferente manera sin distinshon di rasa, kredu òf ideanan polítiko. Inisiativanan lokal i internashonal, tur dirigí riba e puntonan di atenshon di Rotary. Núkleo den esaki ta e base di integridat, ku ta krea un koperashon fuerte entre partner- i amigunan di Rotary. Rotary ta un fellowship mundial ku un solo vishon: “Service above Self”.

Djamars 11 di yüni presidente Benno van Leeuwen tabatin e honor di por kondekorá tur miembro di Rotary ku un boton di Paul Harris. Un momentu memorabel den historia di Rotary na Kòrsou. Benno a ekspresá su apresio pa e esfuersonan di tur fellow, ku kada bia di nobo ta duna di nan mes pa komunidat di Kòrsou, sin niun interés. E kombinashon “mucha” i “durabilidat” ta e liña kòrá ku ta kore den organisashon di tur evento ku Rotary Club Willemstad ta organisá. Durante e aña ku a pasa Rotary a rekoudá sigur f 145.000 nèto pa bon kousanan. A dediká mas ku 1800 ora na diferente proyekto sosial i ku bon koperashon di leveranciers a haña f 35.000na merkansia i servisio. Durante e anochi akí Benno van Leeuwen a gradisí tur partner i amigu di kurason.

Forsa di Rotary a bira kla aña pasá ora ku Rotary Internashonal a hasi un donashon di kasi 100 mil dòler pa un aparato di mamografía nobo pa Fundashon Prevenshon. Donashonnan asina di Rotary Internashonal ta posibel ku e hopi donashonnan ku nan ta risibí. Pa kada donashon di 1000 dòler, e dunadó ta keda rekonosé komo Paul Harris Fellow.

Un proyekto mundial di Rotary ta e akshon “End Polio Now”. Vários mion mucha ta haña nan vakuna via e proyekto akí, di manera ku den algun aña por kaba ku e malesa mundialmente. Otro prueba ku Rotary ta un bon partner ta e donashonnan di Bill Gates, ku e aña akí tambe ta dòbel e suma total hasi100 mion dòler pa “End Polio Now.” Rotary Club Willemstad ta keda traha lokalmente na proyektonan pa hóbennan i den kuido di salú preventivo pa mucha.