Rotary Club Willemstad (RCW) ta organisá djadumingu 18 di mart su proyekto di fundraising anual yamá Rotarally, kual e aña aki lo start entre 12’or i 12’or i mei na parkerplats di Brakkeput MeiMei. E rally aki ta pasa na kamindanan spesial i menos konosí rònt Korsou i ta rekauda fondo pa bon kousanan enfoká riba hubentud di Korsou. Por kumpra karchi via di e kamindanan konosi i serka miembronan di Rotary Club Willemstad.
Paseo di pùzel
Rotarally ta un paseo di pùzel kaminda un i tur por partisipá. E ta kuminsá entre 12.00 i 12.30 na parkerplats di Brakkeput MeiMei i ta terminá na Hòfi Rust & Burg (Asiento). Manera tur aña lo tin tantu e Paseo di Pùzel, komo pa e muchanan e konkurso popular Tooby Rotarally. Partisipantenan na e Rally, ku ta hopi great pa hasi ku bo famia, gruponan di amigu of tim di trabou, por gana premionan bunita.
Kontribushon pa kada outo ku ta partisipá ta f 125,- i por kore e ruta gewon den outo di famia. Na final di e paseo partisipantenan por sigui gosa di un BBQ sukulento i di dushi muzik na Hòfi Rust & Burg. E suma di 125 florin ta inkluí dos voucher pa e BBQ aki. Klaro ku por kumpra èkstra karchi di BBQ na e sitio aki mes pa 30 florin i tambe por kumpra serbes i softdrinks.
Fundraising
Rotary Club ta un klup di servisio ‘non-profit’ ku, pa medio di tur su eventonan, ta hasi donashon pa e bon kausanan riba nos isla. Foko di Rotary Club Willemstad ta prinsipalmente ‘hubentut di Kòrsou’.
Den pasado ganashi di Rotarally a bai pa un gran kantidat di bon kousa: entre otro Bikes For Kids, Jeugdtheaterschool Drazans i tambe pa e proyekto deportivo di Fundashon Desaroyo i Progreso (FdiP). Otro ehèmpelnan di proyekto ku a haña donashon di Rotary Club Willemstad ta; Casa Cuna Mercedes Winkel, Stichting Encelia, Stichting St. Vincentius, Fundashon Un Hoben Pa un Bon Famia, Kas Bruder Pius, Stichting Pro Alfa, Stichting SHOCK, Departamentu di Mucha di Sehos, Fundashon Pro Bista, Prinses Wilhelmina Fonds i Curaçaose Kunstkring.
Spònser i Benta di Karchi
Rotarally 2018 ta posibel pa medio di e spònsernan principal Maduro & Curiel’s Bank i Guardian Group. Por kumpra karchi Van den Tweel Supermarket (Albert Heijn Zeelandia), Mensing’s Caminada i miembronan di Rotary Club Willemstad. Pa mas informashon por tuma kontakto ku Rotary Club Willemstad na: 540-2679 òf 522-3078.