Caribbean Travel Award 2015 a premia 20 organisacion, destinacion of personahe

ORANJESTAD, Aruba – December 2015: Di un banda nos ta un di e islanan mas chikito den Caribe, pero di otro banda ta considera nos un di e mas grandinan ora ta referi na crecemento y desaroyo y maneho di turismo. Y den esey e aña aki e ‘Caribbean Travel Awards 2015’ a honra e Chief Executive Officer di Aruba Tourism Authority como e ‘Caribbean Tourism Director of the Year’.

Entre e premiacionnan, Barbados a sali ‘Caribbean Destination of the Year’, The Ritz-Carlton na Grand Cayman como e ‘Caribbean Hotel of the Year’, Marriott na Port-au-Prince – Haiti como e ‘New Hotel of the Year’, Moses Kirkconnell di Cayman Island como ‘Caribbean Tourism Minister of the Year’, mientras cu e ‘Caribbean Tourism Director of the Year’ a bay pa Ronella Tjin Asjoe-Croes di Aruba Tourism Authority.

E motivacion, segun ‘Caribbean Travel Awards’, pa e premio aki ta debi cu siendo un isla asina chikito, cu Aruba a sa di crece y bira un di e ‘heavyweights’ di e industria turistico den Caribe. E isla a traduci su mes den un ‘high-thinking tourism market’ cu semper ta un of dos paso adelanta di mayoria di e otro islanan turistico den nos region. E logro aki den hopi caso ta debi na e mesun dinamismo y maneho di Ronella Tjin Asjoe-Croes di Aruba Tourism Authority. E ultimo aki a contribui, hunto cu henter e ekipo di A.T.A., pa logra un otro aña exitoso den turismo. Riba dje e organisacion tras di ‘The Caribbean Travel Awards 2015’ ta mira cu Aruba a sa di mantene su imagen como uno fresco, hoben y creativo.

Aña pasa ‘Caribbean Journal’ a lansa pa prome bes e premio ‘Caribbean Travel Awards’ pa honra hotelnan, destinacionnan y hendenan cu ta destaca pa haci biahamento pa Caribe miho. Na tur a honra 20 diferente premio special, den diferente ramo, pa mustra cu tin excelencia y superacion tanto den e producto turistico den Caribe como tambe e hendenan cu ta haci esaki posibel.

Ronella Tjin Asjoe-Croes a studia na Colegio Arubano na Aruba pa despues logra su titulo di Master in Business Administration.

Ora cu Aruba Tourism Authority a bira ‘Sui Generis’ na aña 2011, Tjin Asjoe-Croes a wordo recluta como e prome Chief Executive Officer pa A.T.A.

A.T.A. SG durante e ultimo 4 añanan a percura, conhuntamente cu socionan, pa entre otro un crecemento den e cantidad di turistanan yegando Aruba, crecemento den REVPar y den Tourism Receipt. A.T.A. como organisacion tambe a crece, cu un aumento den su actividadnan, den su presupuesto y den logra metanan apunta adelanta. Pa Tjin Asjoe-Croes despues di a labora 6 aña como Directora di Tourism Corporation Bonaire, na 2014 a cumpli 10 aña ta asumiendo liderato di un oficina di turismo. Oficinanan den formatonan diferente y destinacionnan diferente cu ta rekeri diferencia den maneho tambe.

“Mi ta dedica e premio aki na henter e ekipo di A.T.A.”, asina Ronella Tjin Asjoe-Croes a duna di conoce ora cu a puntr’e riba e distincion special otorga na dje dor di Caribbean Journal. E ta convenci cu tipo di nominacionnan y premionan asina, mescos cu otronan cu A.T.A. a bin ta gana, ta sirbi como un berdadero estimulo pa sigui traha na desaroyo y progreso di nos turismo.

Aña pasa Caribbean Journal a honra entre otro Ewald Biemans como Green Hotelier pa aña 2014.