MAS VUELO TA CREA MAS OPORTUNIDAD PA CRECEMENTO TURISTICO

ORANJESTAD, Aruba – December 2015: “Cada biaha cu nos celebra inauguracion di un vuelo nobo, un destinacion nobo, automaticamente nos ta celebra mas oportunidad pa crecemento turistico pa nos isla”, asina Ronella Tjin Asjoe-Croes, Chief Executive Officer di Aruba Tourism Authority a duna di conoce diaranson mainta trempan, na ocasion di celebracion di e vuelo AG-501 di Aruba Airlines cu destinacion Corsou y despues sigui pa Republica Dominicana.

Hunto cu demas ehecutivonan di Aruba Tourism Authority, a felicita directiva di Aruba Airlines cu e vuelo nobo aki. E aerolinea mas nobo di nos isla ta bula tur diaranson, diabierna y diasabra, saliendo 8:15 am pa Corsou y sigui despues 9:30 am pa Republica Dominicana. E mesun avion lo sali 2:30 merdia bek for di Republica Dominicana pa Corsou y sali 4:15 pm for di Corsou pa Aruba. E orarionan combiniente sigur lo atrae un cantidad di pasahero for di tur e destinacionnan pa otro.

“Tanto e mercado di Corsou como Republica Dominicana ta interesante pa nos, tanto pa nos relacionnan cultural, familiar y sin lubida pa pasa vakantie”, di acuerdo cu Ronella Tjin Asjoe-Croes. E ta contento di analisa e trayecto di Aruba Airlines cu a crece masha durante e ultimo aña. Mas leu e director di A.T.A. a sigura di a keda impresiona cu e plannan di Aruba Airlines pa aña 2016, cu ta inclui aumento di vuelonan y otro destinacionnan.

Den cuadro di crecemento di nos industria turistico, ta necesario pa por conta cu aerolineanan y stoelnan disponibel riba e vuelonan. Cu e vision di Aruba Tourism Authority y e pronostico di crecemento pa aña 2016, ta importante di por conta cu mas vuelo. Den esey, e disponibilidad di mas aerolinea local sin duda ta aporta grandemente na e diferente opcionnan cu e turistanan tin pa yega Aruba.