Willemstad – Ayera anochi Romeo Heije a yega Kòrsou ku vuelo di AA for di Miami. Djasabra dia 28 di yüli último, riba inisiativa di Curaçao Lions Club ku aporte di Fundashon Pro Bista i CTB, Romeo a representá Kòrsou na e di X Festival Internacional de la Canción para Personas con Discapacidad Visual ku ta tuma lugá na Guatemala. Romeo Heije no a gana e festival pero a sa di laga un impreshon grandi atrás. E organisashon a pidi Romeo pa regresá Guatemala pronto pa kompartí su konosementu artístiko musikal. Ademas nan a ekstendé un invitashon pa partispá otro aña atrobe. Banda di esei a estrechá lasonan amistoso entre e organisashon di hendenan di desabilidat visual na Guatemala i Fundashon Pro Bista. E lasonan di amistat ku Fundashon Pro Bista a haña pa medio di partisipashon di Romeo sigur lo benefisiá nan den futuro. Ademas tur partisipante, delegado i bishitante di e festival a keda papia di Kòrsou so. Ganador di e festival a resultá e partisipante di Costa Rica.

Presidente di Curaçao Lions Club Mariela Romero, ta sumamente kontentu ku Lions Club por a ehekutá e proyekto aki. “Romeo no a gana e festival pero el sa di gana tur hende su kurason i a pone Kòrsou riba mapa internashonal komo un isla ku tin hopi hende talentoso”. For di Romeo su promé presentashon ku e kansion Patria Stimá di Ced Ride por a mira e bandera di Kòrsou lusi riba esenario i riba pantaya. Hopi ta esnan ku a sigui e streaming via Facebook tambe. Romeo a hasi diferente entrevista na radionan di Guatemala kaminda ela presentá Kòrsou komo e mihó destinashon turistiko di Karibe.

Mariela huntu ku Gibi Goilo ayeranochi a buska Romeo, Ludwin Margarita i Victor Libiee ku un bunita ramo di flor demostrando asina Curaçao Lions Club su apresio pa e tremendo presentashon i representashon di Kòrsou na Guatemala. Curaçao Lions Club ta yama danki na Fundashon Pro Bista, Curacao Tourist Board, medionan di komunikadhon i un i tur ku a apoyá Romeo i e proyekto den su totalidat.