Danki na e kooperashon un biaha mas di organisadó Blue Bay Curaçao Golf & Beach Resort i patrosinador prinsipal Maduro & Curiel’s Bank, e torneo internashonal di golf anual ta den porta. Di 6 te ku 9 di April, Korsou lo ta esenario di ‘MCB Curaçao Masters 2016’. Lo ta di dies (10) biaha ku e torneo grandi di golf aki di region di Caribe ta keda organisá i ta hustamente ku den e aña ku MCB ta selebrá su di 100 aniversario. I ta en konekshon ku e dos hubileonan, e organisashon a anunsia presensia di eks hungador dio Tour di golf Europeo Robert-Jan Derksen di Hulanda!

Derksen a kuminsa su karera profeshonal na 1997 i den e aña ey ela hunga den e Tour Asiatiko i e European Challenge Tour. Na 1998 ela hasi su debut na e nivel mas haltu di Europa. Na 2003 Derksen a gana su prome titulo durante di e Dubai Desert Classic. Na e okashon ei ela derota e number dos di mundu na e momento ey, Ernie Els.

Na 2005 Derksen a gana su di dos torneo riba e Tour Europeo: Mareira Open na Portugal. Ku un birdie riba e ultimo hole (buraku) ela logra su di dos viktoria. A sigi un di 2^e lugá durante di Open di Mosku i e BMW Asian Open, un di 3^e puesto den Mallorca Classic i diferente klasifikashon mas den e top-10 puestonan. Derksen a pone un fin na su karera profeshonal na e KLM Open di 2014. E aña ey ela hunga no menos ku pa e di 20 biaha den e torneo mas grandi di Hulanda i e a finalisa na puesto 11 komparti, ku un skor final di -8. Ta en bista di su multiple eksitonan na e nivel di mas haltu di golf ta konsidera Derksen komo un di e golfistanan di mas eksitoso ku hamas Hulanda a produsi.

Ku presensia di Derksen na Korsou, e organisashon ke promove Korsou komo un destinashon turístiko di golf. Djasabra dia 2 di April, e organisashon di e evento ta bai tin un anochi spesial, pa asina duna oportunidat pa topa ku Robert-Jan Derksen den un esfera informal na e playa di Blue Bay. Patrosinador prinsipal MCB i e otro sponsornan platina ta invitá pa sigui e asina yamá ‘Tour-Stories di Robert-Jan Derksen’. Ademas di esei, esnan interesá lo por haña un karchi di entrada via di events@bluebay-curacao.com i/of +5999 869 1332.

 TORNEO

Ademas di Derksen, e organisashon e aña aki ta duna bonbiní atrobe na 27 golfista profeshonal i 84 amateur for di diferente pais: Korsou, Canada, USA, Colombia, Venezuela, Jamaica, Hulanda, Alemania, Inglatera I Suesia. Ademas lo bai tey tambe sinku eks-kampeon ku naturalmente ta bai hasi nan esfuerso pa bolbe bai ku e titulo maksimo: Otto Solis (2015 & 2008, Venezuela), Ralph Miller (2014 & 2012, Hulanda), Cameron Booth (2013, USA), Miguel Martinez (2011 & 2009, Venezuela), Peter Horrobin (2007, Jamaica). Ademas di e torneo pa e profeshonalnan lo tin dos otro torneo durante di e evento:

1. Top Amateur Championship ku ta un kompetensha“strokeplay” pa e golfista amateur rutiná.
2. Team Championship ku lo hunga durante di dos dia. Kada ekipo lo k0nisti di tres amateur i un profeshonal.

 Kids Clicic i Dia di Famia

Ta un hecho ku MCB Curaçao Masters 2016 ta mas ku simplemente golf. Djarason dia 6 di april lo tin e tradishonal klínika pa hobennan na Blue Bay Golf. E aña aki e lo ta bou di ditrekshon di e PRO nobo di Blue Bay, Roland-Jan Schippers. Esey lo enserá tambe inisio di Kids Golf Academy.

Djasabra dia 9 april e torneo lo tin su final spektakular ku e ultimo dia di kompetenbsha na Blue Bay. Ta bai tin hopi (golf) entertainment. Riba e Djasabra aki hinter famia ta invita pa for di 2or di merdia mira golf di nivel for dfi e tribunanan ku lo ta den sombra. Ademas di e hopi aktividatnan lo tin diferente wega pa hoben i adulto. Naturalmentre ku kosnan di kome i bebe i un sorteo ku premionan realmente atraktivo. Pa e dia di famia aki entrada loi ta GRATIS. Tira un bista riba: www.curacaomasters.com & www.facebeook.com/bluebaygolf pa mas informashon.