Edificio di Riu Palace Antillas a celebra 40 aña di existencia

ORANJESTAD, Aruba – 26 di November, 2017: Riu Palace Antillas a celebra 40 aña di existencia di e edificio y pa cu esaki nan a tene un exhibicion. Durante e exhibicion tur hende por a mira e cambionan cu e hotel a pasa aden. Tur a disfruta e anochi aki di e canticanan di e pianista como e snacknan y tabata elogia Riu Palace Antillas pa celebra e 40 aña di e edificio cu antes tabata bou nomber di Aruba Concorde Hotel. Semper ta bunita pa reflexiona riba historia di turismo di Aruba. Ronella Tjin Asjoe-Croes, CEO di Aruba Tourism Authority (ATA), ta kere cu e edificio unda Riu Palace Antillas ta situa, cu tur su faceta y memoria y cada un di nan a contribui na e desaroyo turistico di Aruba. “Tabata bunita pa mira tur e potretnan, pero mas importante tabata cu por a comparti historia cu ta hiba nos bek te cu 40 aña pasa”, asina el a expresa.

Durante e exposicion a topa cu hendenan cu ainda a forma parti di e industria turistico y organisacion cu awe ta ocupa e edificio. El a elogia Riu Palace Antillas pa bin cu iniciativa asina aki, unda por a mira diferente potret y laga nan comparti e momento cu Freddy Molina, kende tin 40 aña trahando den e edificio aki. “Sigur palabranan di elogio pero bunita pa por reflexiona riba e logronan y evolucion riba nos industria turistico”, el a expresa. Victor Camacho ta e pianista solista di Riu Palace Aruba desde aña 2007 y tabatin e honor di toca na e celebracion di 40 aña di existencia di e edificio di Concorde, Wyndham, Westin y Riu Palace Antillas. E ta recorda cu pa 11 aña largo el a toca piano den Wyndham y esaki tabata algo inolvidabel.

E turista Paul Bonello ta biniendo Aruba pa 30 aña, di cual el a keda eynan tempo di Aruba Concorde Hotel. Durante su añanan na diferente ocasion el a keda na Riu Palace Antillas y esaki a cambia. Un cos cu e ta haya falta di dje ta e holoshi tempo cu esaki tabata Westin. Riu Palace Antillas ta bunita, e pool, restaurantnan y awo tin hopi mas escogencia unda pa come. “Antes mester a sali for di hotel si bo tabata kier un variacion”, el a indica. E ta gusta con e hotel ta awendia cu esey ta un di e motibonan pakico e ta keda eynan. Famia Riu a funda Riu Hotels & Resorts como un hotel chikito na aña 1953, na Majorca, Spaña. Awendia RIU, cu ta partner cu TUI, e compania di tours mas grandi na mundo, ta ofrece 95 hotel, di cual riba 70% ta ofrece acomodacion “all inclusive”. Riu Hotels & Resorts ta bou maneho diario di e di tres generacion di famia Riu, cu oficina principal na Majorca y ta conta cu riba 26 mil empleado y ta estableci den 19 pais, manera Spaña, Portugal, Irlanda, Alemania, Bulgaria, Turkia, Morocco, Merca, Mexico, Jamaica, Bahamas, Aruba, Costa Rica, Republica Dominicana, Panama, Cabo Verde, Mauritius, St. Martin y Sri Lanka.

Aki na Aruba, Riu Hotels & Resorts a habri Riu Palace Aruba na aña 2007. Debi na e gran exito di su prome hotel na Aruba, e compania a dicidi di adkiri un di dos hotel, habriendo Riu Palace Antillas na aña 2014. Hunto e dos hotelnan aki ta maneha mas o menos 25 mil huesped pa luna, cu un nivel di grado di ocupacion mas halto riba nos isla. Entre e dos hotelnan RIU na Aruba, nan ta emplea riba 800 trahado, brindando huespednan e miho nivel di servicio.