Entrante di e aña aki, direktiva di AMAK hasiendo uso di teknologia moderno, ta habri e oportunidat pa tur hende unda parti di mundu ku nan ta, risibí riba nan telefon  informashon na momentu ku inskripshonnan drenta. A apliká ta fásil.

Bai riba www.festivalditumba.net i  registrá. Skibi bo nòmber i bo number di telefon. Pa usuarionan aki na Kòrsou mester yena únikamente nan 7 digitonan. Pa usuarionan den otro parti di mundu, mester pone dilanti 00 sigui pa e kódigo di e pais i su number di telefon.

Tur hende ku registrá lo risibí un mensahe bou di e nòmber: TUMBA 2016 ku ta bisa danki pa registrá. Lo bo risibí un mensahe ora tin inskripshon nobo. Nos ta pidi tur hende tambe keda pendiente pa e app di Festival di Tumba riba bo telefon.

DOS BANDA DEN SHOW TIME

Djadumingu awor na okashon di inskripshon pa Festival di Tumba 2016, lo tin  dos banda ku lo bai entretené. Unu lo ta e banda Twins i e otro lo ta Time.

MUSIKONAN ASERKA RADIONAN

Den reunionnan di AMAK tin kompositornan i kantantenan ku a opservá ku talbes pasombra nan no ta dje popular ei nan no ta keda entrevista. Nos a papia esaki ku algun radio emisora i nan a bisa pa e kantante kompositornan yega tempran i nan mes aserka e radio emisoranan.