WILLEMSTAD – Maduro & Curiel’s Bank N.V. huntu ku Innovatie Centrum Curaçao, MEO i ADECK a uni forsa pa asina sigui kontribuí pa enkurashá e espíritu empresarial i inovativo den nos komunidat. E biaha aki esaki a tuma lugá den forma di un kompetensia pa e mihó inovashon di sea produkto, servisio òf proseso empresarial ku yama I-Factor TV (“I” di “innovation/inovashon”) i ku a keda transmití na televishon for di 11 di Novèmber 2013. Meta di e proyekto tabata pa informá komunidat di e importansia di inovashon, duna sugerensia kon pa inová i na mes momentu e programa a inkluí un kompetensia kaminda partisipantenan ku ideanan komersial inovativo a kompetí kontra otro. Di e manera aki MCB su departamentu di Empresa Chikí ta kontribuí na duna informashon i alabes ta enkurashá inovashon bou di (futuro) empresarionan. Komunidat a reakshoná hopi entusiasmá ku e programa i un total di 61 persona a registrá ku nan idea pa un produkto, servisio òf  proseso inovativo pa partisipá na I-Factor TV. Tur e partisipantenan aki a pasa un proseso di “pre-casting” kaminda nan tabatin 3 minüt pa splika e kuerpo di hurado mas detaye di nan inovashon. For di tur e partisipantenan aki a selektá e 30 mihó inovashonnan ku dia 29 di sèptèmber 2013 a partisipá na e “casting” na MCB Rooi Catootje. Riba e dia aki e 30 partisipantenan tabatin 3 minüt pa duna un presentashon riba nan idea inovativo i 2 minüt pa kontestá preguntanan di e hurado. Meta di e presentashon tabata pa konvensé e huradonan dikon nan idea ta esun di mas inovativo. For di tur partisipante e hurado a selektá un total di 8 finalista di kual públiko por a haña informashon amplio tokante nan inovashon durante e episodionan di I-Factor TV ku a keda transmití na Telecuraçao. E 8 finalistanan a resultá di ta e siguiente personanan:

1. Richard Martina – Ridje Chrome webpage customization
2. Renato Ignacio – App Miappoint, app pa evitá paramentu den rij
3. Otello Reenis – Curaçao Classic Boat
4. Archel Kwidama – The Sabios, wega pa mucha
5. Jeritza Beaumont – Bolo Pretu den empake di kas di kunuku
6. Raymond Jamanika – Simulator pa siña kore outo
7. Geert Huisman – Mobile Alarm App
8. Raycine Decaster Godfried – C2B card

Dia 17 di desèmber último e gran final di I-Factor TV a wòrdu transmití durante kual por a eksperiensiá kon tur e 8 finalistanan aki a kompetí ku otro di un manera fuerte, den e “Hot Spot Challenge” pa asina konvens’é e huradonan di nan inovashon. E kuerpo di hurado a evaluá e kontenido di e inovashon a base di e siguiente kriterionan: 1] originalidat di e idea, 2] impakto di e inovashon i 3] realisabel pa merkado.  Públiko na kas tambe tabatin e oportunidat di influensiá e puntuashon dor di “like” e video di nan finalista preferí riba e página di Facebook di I-Factor TV. E kantidat di “likes” ku kada partisipante a risibí pa su video riba Facebook a wòrdu añadí riba e punto ku e huradonan a duna pa e inovashon pa asina determiná e puntuashon final. Richard Martina ku su inovashon “Ridje” kual ta un website “plug-in” ku ta duna usuarionan di internèt e posibilidat pa adaptá un página di wèp na nan gusto i asina por ta liber pa nan mes disidí kiko nan ke eksperensiá di un webpage.  Archel Kwidama ku su ‘placemat” edukativo pa mucha titulá “The Sabios” a resultá promé finalista siguí pa Renato Ignacio ku su “Mi Appoint App”, pa evitá paramentu den rij, a resultá segundo finalista. Otello Reenis ku su inovashon Curaçao Classic Boat, ku ta un idea pa desaroyá nos Waaigat den un área turístiko akuátiko, a resultá terser finalista. Komo ganador di I-Factor TV 2013 Richard Martina a risibí un suma di NAf. 7.500,-; un trofeo diseñá pa Engraving Designs & Printing ku e título di Innovatieprijs 2013; un telefòn selular di Digicel  i finansiamentu garantisá di Maduro & Curiel’s Bank N.V. pa un máksimo di NAf. 10,000.= . E tres finalistanan a risibí un trofeo di Fantasy Arts i tambe otro premionan. Maduro & Curiel’s Bank N.V., Innovatie Centrum Curaçao, Adeck i MEO ta e spònsernan prinsipal di I-Factor TV, pero tambe un danki ta bai na tur e otro spònsernan ku a uni pa hasi e programa inovativo aki posibel kual ta: University of Curaçao dr. Moises da Costa Gomez, W. Sound & Images, Margil Party Rental, Digicel, Texas Alaparia, Quiznos, Fantasy Arts, Coca Cola, Engraving Designs & Printing, Ennia, Club Private i Knockz Productions. I-Factor TV por mira bèk na un etapa sumamente eksitoso durante kual komunidat kompletu a risibí informashon balioso tokante inovashon i tambe 61 partisipante a haña oportunidat pa presentá nan inovashon. Un gradisimentu ta bai na tur persona ku e aña aki a partisipá na I-Factor TV pa nan kurashi i espíritu inovativo. Si bo tin un idea inovativo i tin deseo di partisipá den e posibel siguiente etapa di I-Factor TV, por komuniká esaki riba e página di Facebook di I-Factor TV riba kual tambe por mira tur e episodionan di e promé etapa. Maduro & Curiel’s Bank N.V. ta felisitá Richard Martina i tambe e finalistanan di I-Factor TV 2013 i ta sigui kontribuí na desaroyo di nos ekonomia. Bo Banko Amigu ta keda É Banko pa empresa chikí ku ta enkurashá inovashon! On the picture: Ganador di I-Factor TV señor Richard Martina risibiendo su premio di señora Suhaily Hooi di Innovatiecentrum Curaçao kompaña pa señor Jerry van Gijn, miembro di gerensia di Maduro & Curiel’s Bank N.V.