Desaroyonan positivo den urban scene lokal

WILLEMSTAD/ Den transkurso di e último dianan fanátikonan di tantu Rich Kalash i Jaido por a tuma nota riba Instagram di algun foto ku ámbos artista a ‘share’. T’asina ku e artistanan tabata na Medellin, Colombia pa grabashon di un videoclip ku sigur ta pinta di bira interesante. Ámbos artista di Decoded lo kuminsa move internashonalmente, asina por hasi menshon ku ya kaba Rich Kalash a kuminsa graba algun track na Ulandes. Konsiderando ku e ta dominá e idioma perfektamente a probechá oportunidatnan ku a presentá na Ulanda. E tracknan aki, ta pendiente pa sali, pues fanatikonan mester keda pendiente. Di otro banda, lo duna preferensia na merkado latino i e promé stap ta grabashon na Medellin.

E grabashonnan a tuma lugá e siman tra’i lomba; Greyan Films den kolaborashon ku Decoded a biaha ku e kabayeronan djamars último i ya pa djabièrnè a kompletá e serie di grabashonnan ku a keda skematisá.  Fanátikonan por mira sigui Rich Kalash, Jaido i tur artista di Decoded riba e Youtube Channel @decodedofficial. Por stream riba ITunes, Spotify, Google Play i Apple Music tambe.