WILLEMSTAD, Curaçao 2015: El Gran Combo de Puerto Rico mihó konosí komo El Gran Combo tambe ta forma parti di e line-up pa e gran konsierto, Viva La Musica Latina. El Gran Combo fundá pa Rafael Ithier na  luna di mei di 1962 ta un orkesta di salsa portorikeño- i un di esnan ku e trayektoria di mas largu i impreshonante di nan generashon. Na 2012 El Gran Combo kende ta wòrdu konsiderá e agrupashon musikal di salsa di mas eksitoso i di mas popular di tur tempu, a selebrá nan 50 aniversario ku un gira rònt mundu. E gira aki a permití El Gran Combo pa bishitá un total di 5 kontinente. Den su trayektorio te ku 2013, El Gran Combo a graba un total di 67 disko kompakto. Komo rekonosementu e grupo musikal a risibí e nòmber ‘La Universidad de la Salsa’ na Colombia debí na e numeroso músiko i kantantenan di salsa famoso ku a desaroyá nan karera musikal den El Gran Combo partikularmente Andy Montañez òf esnan ku na diferente okashon a wòrdu kompañá pa e banda inkluyendo Celia Cruz, Hector Lavoe i La India. Djasabra 30 di mei Kòrsou lo namorá di Salsa un bes mas ku presentashon di El Gran Combo representá pa su kantantenan estelar Charlie Aponte, Jerry Rivas i Luis “Papo” Rosario. Websáit: http://www.elgrancombodepuertorico.net/

Tokante  “Viva La Musica Latina Curaçao 2015”:
Lo tin riba esenario durante dos anochi, shete artista. E konsierto lo tuma lugá riba lugar di parker di Sambil riba e anochinan di 29 ku 30 di Mei próksimo. Un tereno kompletamente asfaltá, hanchu, pues ku hopi espasio. Lo ta e promé evento grandi ku lo tuma lugá na SAMBIL Curaçao; un punto stratégiko, fásil pa yega n’e, ku e posibilidat pa stashoná outo riba e mes tereno ku e evento ta. Pa e gran evento aki lo tin un solo esenario pa públiko disfrutá di kada un di e konsiertonan sin pèrdè niun piesa. Ta konstruí un esenario enorme, sufisientemente grandi pa garantisá kambio rápido di un agrupashon pa otro, 30 minüt entre kambio di agrupashon musikal. Artistanan ku lo presentá riba djabièrnè dia 29 di Mei lo ta Guaco, Gilberto Sta. Rosa i Jorge Celedón. Riba djasabra 30 di mei lo presentá, Jose Alberto El Canario, Gran Combo de Puerto Rico, Alberto Barros i Olga Tañon. Riba tur dos dia ta kuminsá 7.30PM. Entrada ta stipulá na 350 florin pa pakete pa 2 anochi i 200 florin pa kada anochi respektivamente. Por kumpra karchi riba krédito via di Norsa N.V -akudí na Kaya Acacia 28 telefon 767 1563 òf na Punda telefon 461 4810.  Tambe tin posibilidat pa kumpra karchi ‘online’ via di www.ticketscaribbean.com; paga, print e-ticket i bin kuné riba e anochinan di konsierto

Pa mas informashon tokante di Viva La Musica Latina por bishitá e página di Facebook òf por yama 737.2025 ext. 135. Keda pendiente pa algun kampaña interesante riba e página di Facebook di Viva La Musica Latina.