WILLEMSTAD, 22 di Febrüari –  Dia 14 di febrüari último Ronald McDonald House Charities Curacao Foundation a tene un dia di benta di bolo I cupcake pa rekoudá fondo pa e organisashon su trabounan na Kinderafdeling di SEHOS. For di 9 or di mainta te 7 or di anochi persona òf kompanianan por a kumpra cupcakes òf un bolo na Mangusa Supermarket I Zuikertuin mall. Banda di esei na kompra di un bolo bo por a risibí un premio huntu ku e bolo. E aña aki resultado tabata inkreibel. Pueblo a sabi di kontribuí na un bon kousa I benta a surpasá e montante di Fl. 20.000 . Esaki ta un subida di 30% kompará ku 2014 ora a bende Fl.14.000 na bolo i cupcake. Naturalmente sin nos spònsernan, tur nos voluntarionan, trahadónan di bolo ku a regalá nan tempu i e bolo na RHMC i naturalmente tur e personanan i kompanianan ku a kumpra bolo esaki lo no tabata posibel. Na nòmber di tur e muchanan i nan famia ku ta keda i lo keda na SEHOS i direktiva di RHMC un danki na tur hende ku a sabi di yuda ku e akshon aki. Trabounan di RHMC lo sigui  na benefisio di nos muchanan.

RMHC:

Fondonan rekoudá ta permití pa kontinuá ku e trabounan den RMHC Family Room i tambe yuda desaroyá inisiativanan importante ku lo benefisiá nos komunidat i espesialmente nos muchanan. For di su establesementu aki na Kòrsou RMHC a sòru pa identifiká, desaroyá i traha riba proyektonan ku ta apoyá programanan ku ta direktamente konektá ku salu hubenil riba tèrmino largu. Ku  e Family Room , RMHC Curacao Foundation a sa di yuda mas di 5000 famia y mucha na Kòrsou ofresiendo nan no solamente un área di rekreashon konfortabel na muchanan interná den hospital pero tambe ta brinda mayornan i famianan di e muchanan aki un kamber konfortabel pa hospedá den dje ya asina nan por  ta serka di nan yu.