WILLEMSTAD – Djaluna dia 9 di desèmber último, Reunion General di Asosiashon di Músiko a bai di akuerdo ku proposishonnan ku a keda presentá pa e komishon enkabesá pa Gregory Colina.
Manera ta konosí,durante General Èkstra Ordinario di AMAK 120819, a tuma e desishon pa forma un komishon konsistiendo di Srsnan Gregory Colina, Ravello Antoin, Gilo Garmers i Ike Jesurun, ku mester a revisá reglanan di Festival di Tumba i kon pa mehorá esakinan i tambe pa bin ku otro proposishonnan general pa selebrashon di e 50 edishon bira algu grandi.
Durante di e reunion general di djaluna dia 9 di desèmber último, a repasá e rekomendashonnan ku a keda presentá i despues di a pasa riba e diferente puntonan aki, sala a bai di akuerdo ku e siguiente rekomendashonnan.
Sekretario Ehekutivo
A bai di akuerdo pa nombra Sr. Gileon Garmers Sekretario Ehekutivo di Hurado. Huntu ku su trabou di hurado di Letra i
Melodia tambe e lo bai keda enkargá ku e parti organisatorio di hurado.
E kuerpo ehekutivo di hurado lo konsistí pues di e siguiente funkshonnan: Presidente, Vise presidente , sekretario, un kordinador atministrativo i un “time keeper”.
Hurado
A bai di akuerdo pa trese un separashon den e sekshon di hurado di Letra i Melodia. Esaki ta pa trese mas klaridat den lo siguiente:
E sekshon aki lo keda formá pa 5 miembro:
- Letra kreativo / Original (50 punto)
- Letra Bon basilon (25 punto)
- Melodia pegagoso / Fásil (25 punto)
- Melodia aspekto nobo (25 punto)
- Entonashon (75 punto)
Si analisá esakinan nos por mira ku ta diferente kriterio, di hopi peso na puntuashon ta wòrdu huzgá den e sekshon aki.
Husga letra ta kompletamente un otro asuntu for di entonashon i liñanan melódiko i ta nesesario pa pone miembronan di hurado , ku ta musikalmente bon eduká pa husga melodia entonashon i areglo.
Tambe komishon ta bai proponé un triterio mas ku mester aparesé den e lista aki: Estilo di interpretashon (Zuai di Tumba).
Pa ilustrá lo por tin un senario kaminda ku un intérprete ku sigur ta kanta 100% den tono, artikulá zùiver, bon timbre di bos pero simplemente e NO ta kantando den e zuai di Tumba.
Tumba Original
Reunion General a bai di akuerdo pa e Tumba Original wòrdu huzgá di e siguiente forma:
A1 : Letra kreativo / original (50 punto)
D1: Melodia aspekto nobo (25 punto)
C2: Areglo kreativo / original (25 punto)
Premio Betty Doran:
A1: Letra kreativo / original (50 punto)
A2: Letra bon basilon (25 punto)
Tumba chistoso:
Lòs for di tur puntuashon i skohe
Plagiat / Entrega di keho etc.
Kualke miembro di hurado por pone Presidente di hurado na altura di plagiat durante festival. Presidente lo evaluá i tuma akshon.
Sala a bai di akuerdo ku si un partisipante ku konstatá plágia, e tin ku entregá un keho ofisial, kompañá pa un PRUEBA pa mas tardá djaweps promé ku djabièrnè final di Tumba. Presidente di hurado i su tim, lo evaluá i analisá esaki i tuma un desishon.
Premio Mihö areglo: Premio Maestro Toro Colina.
Pa por bin na remarke pa e premio, ta nesesario pa entregá e Skor di e kansion:
Un skor mínimo mester konsistí di:
- Harmonia di Brass/Horns
- Harmonia Piano/Bass (chord symbols)
- Figurashon rítmiko (Rhythm slashes)
Meskos ku ta e kaso dia di entrega di letra, komishon ta proponé pa e djaweps, entrega di skor, tin un hurado di areglo presente pa risibí e skornan, ku lo bai kompetí djabièrnè anochi pa e premionan, Premio Maestro Toro Colina, promé i di 2 finalista.
Despues di entregá e dokumentonan menshoná, e hurado por evaluá kuantu areglo lo ta den kontienda anochi final di Tumba.
Durashon di piesa / lus / timer
Lo mantené e lusnan tradishonal. Tambe lo introdusí un timer digital riba pantaya kompa públiko .
Tèmpo di Tumba
E tumba mester ta skibí den kompas di 6/8 i e tèmpo ku ta interpretá un Tumba por tin un velosidat di entre 175 pa195 riba metrònomo.
Wildcard
Lo bai tin un kambio den sakamentu di e finalistanan pa djabièrnè. Originalmente despues di e promé tres dianan preliminar, tabata saka 30 finalista pa partisipá djabièrnè.
Debí na reklamo di esnan ku tabata bisa ku djaluna ta friu, nan a ser votá friu, i e kantidat di finilasta ta menos ku e otro dianan preliminar, e komishon a bin ku un proposishon, ku ta trese un balanse mas hustu.
A akordá pa trese un kambio i duna esnan ku a sali entre number 26 pa 35 un di dos oportunidat, esta den un sistema di “wildcard”.
Ta asina ku despues di e promé tres dianan, ta saka 25 finalista den un forma direkto i tambe 10 komposishon ( 26 te 35) ku lo partisipá den e “wildcard”..
Djaweps dia 30 di yanüari, entre 7 or pa 9 or, mediante di e grabashon video, di e presentashon dje 10 komposishonnan ku sea djaluna, djamars o djarason, ka a kai den e “wild card” pa bolbe presentá riba screen riba stage di Curaçao Festival Center.
E mesun kuerpo di hurado lo bolbe hunga e 10 kansionnan aki i for di nan lo saka 5 ku skor mas haltu i ku lo uni ku e 25 nan ku ya a klasifiká,pa asina ei kompletá 30 tumba.
E djaweps dia 30 di yanüari lo ta un dia èkstra, kaminda e públiko lo por drenta Curaçao Festival Center grátis, pa asina ei presensia e “wildcard” aki. E mesun struktura di votashon lo tuma i nan lo keda husga un biaha mas.
E aktividatnan normal di djaweps ku ta presentashon di mantel i sakamentu di órden di presentashon pa djabièrnè, lo kuminsá 9 or di anochi pa 10 or.
Esaki ta un kambio positivo, kaminda ta duna e 10 tumbanan ku a skor mas haltu despues di 25 e oportunidat pa hurado skuchanan un biaha mas i e mihó 5 nan ta djòin e 25 finalistanan ya konosí pa djabièrnè.
Próksimamente lo sigui mas informashon, pa asina tur kompositor, kantante, agrupashon musikal, músikonan i públiko en general komprondé e kambionan aki, ku ta na bienestar di kresementu di Festival di Tumba 2020.
Atentamente
Direktiva di AMAK