Willemstad, 18 di ougùstùs 2019 – Kontinuashon di e Reunion General pa miembronan di ACU planiá pa tuma lugá djadumingu 18 di ougùstùs a keda kanselá. Na inisio di e enkuentro señora Elsirha Isenia-Scope, Presidente di Konseho di Supervishon di ACU, a splika e alrededor di 200 miembronan ku a bini huntu di kon no por a tene e reunion. Siman pasá e abogado di e miembronan di direktiva anterior a informá di ta bai entamá un huisio sumario kontra e Konseho di Supervishon. E miembronan di e direktiva anterior ta eksigí pa por kontinuá ku nan miembresia di direktiva. Djabièrnè último, 16 di ougùstùs Konseho di Supervishon a risibí alabes un karta na nòmber di “direktiva di ACU”, redaktá riba papel di karta di ACU, firmá pa e kuater miembronan di direktiva ku a keda bahá i e dos miembronan di direktiva ku no a keda bahá den kua nan ta konfirmá loke a keda menshoná ariba.

Awor mester warda riba e posibel desishon di Korte. Señora Isenia-Scope a indiká na e miembronan ku Konseho di Supervishon lo hasi tur loke mester pa por tene elekshon nobo mas pronto posibel. Djarason awor, 21 di ougùstùs tin un enkuentro pendiente ku Banko Sentral pa deliberá kon pa atendé ku e maneho diario di ACU te ku e momentu ei mihó posibel i kon lo organisá e elekshon benidero. Señora Isenia-Scope a duna di konosé tambe ku lo sigui tene miembronan di ACU na altura kontinuamente di e sobrá desaroyonan.

Kontinuidat di e trabounan diario den e organisashon di ACU ta sigui normal.