solushon duradero na kaminda

Willemstad – Kaminda tin determinashon i un meta komun tin solushon i e solushon ta na kaminda pa Parke Tropikal. Awemaintana ofisina di Parke Tropikal representantenan di direktiva, gerente i representantenan di ROP a sinta huntu pa yega na un solushon pa loke ta trata e problema di vergunning pa drecha infrastruktura di e parke. Tabata un reunion hopi positivo i fruktifero kaminda a splika e Masterplan den su totalidat vooral e parti di infrastruktura ku ta kai bou di ROP. Funshonarionan di ROP a indika ku pa nan tambe ta di vital importansia pa yega na un solushon i atende e petishonnan ku e diligensia nesesario. Importante pa menshona ta ku e plan maestro di Fundashon Parke Tropikal ta inklui solushon pa e problematika di ‘afwatering’ pero tambe ta tene kuenta ku konservashon di e naturalesa i medio ambiente uniko di e area ku ta di kasi 40 hectare. E palabrashon konkreto ku ROP ta ku dentro di dos siman Fundashon Parke Tropikal ta entrega e Masterplan reparti den fase pa asina ROP por kaba di studia i kanalisa e proseso ku otro instansianan. Tantu Fundashon Parke Tropikal komo ROP ta di akuerdo ku mester di implementa e plan di desaroyo aki pero ku no por perde for di bista e parti esensial di konservashon di nos medio ambiente. Fundashon Parke Tropikal ta sumamente kontentu ku tiki tiki por mira e lus den horizonte. Korsou tin hopi potensial pero ta dor di traha huntu por logra alkansa e metanan ku nos fiha. Awor ku e parti finansiero i e parti di infrastruktura ta kanando den bon direkshon falta solamente envolvimentu positivo, konsientisashon i kontribushon di nos komunidat pa Fundashon Parke Tropikal por sigui traha riba desaroyo di e parke. E meta final ta pa krea un parke nashonal ku ta internashonalmente akredita ku nos tur Yu di Korsou por ta orguyoso di dje. Un parke ku ta inspira grandi i chiki pa siña i diberti teniendo kuenta ku konservashon di nos bestianan i naturalesa. Tuma kontakto ku Parke Tropikal na 7360188 of like e Facebook page di Parke Tropikal i informa kon abo por duna un aporte.