KRALENDIJK: Tabata den publikashonnan di Extra dia 18 di Mart último ku Union pa konsumidó Boneiru a deklará ku Digicel no a duna oido na un petishon ku a wòrdu hasí pa reuní ku UnKoBon. “Nos ta lamentá e publikashonnan di djamars último; Digicel debidamente a reuní ku UnKoBon den persona di Sr. Hans Evers”, esaki di akuerdo ku Sr. Ray McMahon, gerente general di Digicel Bonaire. Di akuerdo ku Sr. McMahon, e reunion a tuma lugá dia 10 di mart último, 2’or di atardi na ofisina di Digicel den Kaya Grandi. Durante di e kombersashon ameno ku a tuma lugá entre e dos kabayeronan, Sr. McMahon a splika Sr. Evers tur e posibilidat nan ku Digicel ta ofresé su klientenan si nan tin kualke pregunta òf remarke tokante kualkier servisio òf pakete ku e kompania ta ofresé. Durante di e mesun kombersashon aki, Sr. McMahon a informá ku Sr. Evers ku Digicel desafortunadamente lo no por ta presente durante di e aktividat ku lo tabata tin planiá pa tuma lugá dia 15 mart último. Esaki pa motibu ku Sr. McMahon lo no tabata na Boneiru riba dia di e aktividat. Digicel, komo corporate citizen di Boneiru ta sinti su mes yamá pa karga responsabilidat na unda ku por. Aki por suprayá e sosten kontinuo ku Digicel ta duna na diferente organisashon i fundashonnan non-profit riba nos isla. Proyektonan manera ‘Bario Ekstraordinario’ òf patrosinio di klínikanan di futbòl pa hóbennan i sosten na organisashonnan manera Special Olympics ta djis algun ehèmpel di e diferente maneranan ku Digicel ta kontribuí na halsa e kalidat di bida di siudadanonan di Boneiru. Klientenan di Digicel indirektamente ta kontribuí na tur e proyektonan aki, for di su inisio Digicel a komprometé su mes ku e isla- te dia di awe e kompromiso ei ta vigente. E departamento di servisio pa kliente tei pa duna oido na tur pregunta ku e kliente tin, ademas di esaki ta duna asistensia na e kliente riba kualkier servisio. Por yama 145 for di telefònnan di Digicel grátis na tur momentu. “Nos ta kere ku un rektifikashon ta na su lugá, mirando ku e reunion ku a keda solisitá ku nos, debidamente a tuma lugá. Un petishon di un organisashon ku nos ta konsiderá serio i responsabel difísilmente por wòrdu ignorá. Digicel ta un kompania di telekomunikashon serio, ku ta tuma satisfakshon di e kliente na serio i ta purba tur dia di nobo pa ofresé ekselensia den servisio i duna e kliente un eksperensia di yamada sólido”, asina Sr. Ray McMahon, gerente general di Digicel Bonaire a finalisá. Pa mas informashon riba kualke servisio òf pakete por bishitá e wepsáit http://www.digicelbonaire.com òf yama sentro di servisio pa kliente 145 grátis for di bo selular. Por komuniká tambe via Facebook https://www.facebook.com/DigicelBonaire.