E dos hobennan talentoso di bowling Quianna Francesca Macares I Jared Felipa a regresá Kòrsou ku hopi eksperensia I ta satisfecho ku nan prestashon. Tur dos a partisipá na e evento di Teen Masters Grand Championships ku ta pa atletanan bou di 22 aña ku ahinda ta bai skol.  Den e torneo akí ta e abilidat di e atleta ta konta. Kontrali na tur otro kompetensia,  tur atleta ta obligá di huza mesun tipo di bala, esta un “PBA Skill 2.0 Plastic Ball” I un “PBA Skill 3.0 Urethane Ball”. Un total di 91 mucha muhe I 186 mucha homber a partisipá riba kondishon di kancha hopi difisil. Asta e organisador a priminti di mehora e kondishon pa otro aña. Apesar di esaki nos atletanan a duna un bon presentashon mirando ku nan tabata kompetí ku e miho nan di Merka. Den Girls U-20 Quianna Francesca a keda na di 69 luga for di 91 mucha ku un averahe di 153.1. I Jared den Boys U-15 a keda na di 15 luga for di 22 mucha ku un averahe di 142.1 Tambe nan a partisipa na e torneo Madness Play, estilo di knock-out.  Di 20 atleta, mucha homber I mucha muhe di diferente edat,  Quianna Francesca a sali na di 8 luga ku un averahe di 217.33 I Jared na di 10 luga ku un averahe di 184.66. Esaki sin mas tabata tremendo presentashon. Despues di Teen Masters Grand Championships, Quianna Francesca a sigi pa Buffalo, New York pa partisipa na e evento di Junior Gold Championships 2014. E torneo akí ta esun mas grandi I mas importante pa youth bowlers. Un total di 2,500 hoben di tur parti di Merka a partisipá. Tambe tabata tin diferente scout presente di diferente universidat I Team USA. Den su categoria U-20, Quianna Francesca a sali na di 569 luga di un total di 604 mucha ku un averahe   di 148.80. Den un extra torneo, Survivor X Bowling Junior Gold 2014, Quianna Francesca a bowl un averahe di 169 pa keda na di 179 luga for di 287 atleta. Despues di a eksperensiá e diferente kanchanan, kondishonnan I kontrikantenan tur dos atleta ta mas determiná ku nunka pa sigi train duru pa mehora nan mes.  Ya ku nan a ripará ku no ta algu imposibel, mirando ku e tiki rekurso ku nos isla chikitu tini I sin apoyo di un coach huntu ku nan  na momento di wega, tòg nan a logra di duna bataya. Ta di spera ku e proksimo bia lo por haña sufisiente koperashon di fondo ku nos atletanan por biaha ku nan coach, ku lo ta un sosten hopi balioso durante wega. Di kurason Quianna Francesca Macares I Jared Felipa ta gradisi tur spònsor I instansia ku a kopera ku nan I specialmente nan coach Carlos Rodriguez di Caribbean Bowling Zeelandia.