WILLEMSTAD- Djadumingu 26 Aprel último HOPE Softball Tournament 2015 a konosé un tremendo klousura. Un SUVEK yená ku fanátikonan ku tabatin e oportunidat pa presensiá algun wega final hopi interesante i eksitante. E dia a kuminsá ku un wega amistoso entre e organisashon di HOPE i New Creration Curaçao, e fundashon pa kual e fondonan di aña aki ta wòrdu rekoudá. Den oranan di mèrdia a sigui ku e wega final entre SOAB i MCB. Un partido den e kategoría di COED kual MCB a sabi di gana ku 7 pa 0. Despues di esaki a sigui den e kategoría di challenger maskulino e final entre e timnan di Selikor i Aqualectra. Apesar di bon hugadanan di parti di Selikor nan no a logra gana e partido aki. Aqualectra banda di a gana tur su partidonan den temporada prome ku play-off, a sabi di gana e título di kampion di e prestigioso torneo aki ku un skor di 8 pa 5. Seguidamente a pasa pa e kategoría sosial femenino kaminda e damasnan di MCB akinan tambe a logra yega den e final kontra di e damas nan di ADC/Giro, kual partido a finalisá 6 pa 3 den bentaha di MCB.
E ultimo partido kual tabata den e kategoría di sosial maskulino tabata esun mas kayente. Den e partido aki SOAB a sabi di pasa riba Pinnacle i sali viktorioso ku un resultado di 22 pa 2. Despues di tur esaki Dreams a sabi di entretené e públiko presente ku tabata bastante grandi. Entrega di premio a tuma lugá e mesun anochi ey. Aparte di e kampion i sub kampionnan den e 4 diferente kategoríanan di e torneo a repartí e siguiente premionan:
| Kampioen Bateo Sosial Femenino 2015 | J. Ricardo, SVB |
| Kampioen Bateo Sosial Maskulino 2015 | R. Fecunda, D & I |
| Kampion Bateo Challenger Maskulino 2015 | S. Antersijn, SBAB |
| Kampion Bateo COED 2015 | K. Felicia, Kooyman |
| Kampioen Picher Sosial Femenino 2015 | S. Francisca, ADC/Giro |
| Kampioen Picher Sosial Maskulino 2015 | C. Corea, Inselair |
| Kampion Picher Challenger Maskulino 2015 | J. Wall, Refineria Isla |
| Kampion Picher COED 2015 | J. Koeiman, SOAB |
| Kampion Homerun Sosial Femenino 2015 | J. Ricardo, SVB |
| Kampioen Homerun Sosial Maskulino 2015 | J. Pieters, SBAB |
| Kampion Homerun Challenger Maskulino 2015 | C. Servania, Brandweer |
| Kampion Homerun COED 2015 | D. Janga, CITCO |
| Most Valuable Player Sosial Femenino 2015 | L. Avastia, MCB |
| Most Valuable Player Sosial Maskulino 2015 | J. Koeiman, SOAB |
| Most Valuable Player Challenger Maskulino 2015 | R. Sambo, Aqualectra |
| Most Valuable Player COED 2015 | R. Kirindongo, MCB |
Simbólikamente a hasi entrega di un ember ku algun hèrment di kura pa husa den e “green hous” ora esaki ta kla na Stichting New Creation Curaçao, na kual tur e fondo nan rekoudá durante e torneo aki ta bai. Tur ssaki ta posibel e aña aki danki na entre otro tur ku a asistí durante 6 siman largu pa presensiá e weganan di sòfbòl slowpitch sosial i tur otro spònser nan manera MCB, Refineria Isla, Drukkerij Martina, XEROX, de Jongh Sporthuis i Changes.
E Asosashon di Aktividatnan Soshal di SOAB, ACZHON i HEINEKEN kier gradisí tur timnan partisipante, boluntario nan ku a yuda di un o otro forma, sin kier lubidá Chati Constancia, Gino Valeriaan, Ludson Clemencia i Jeffrey Martina ku tambe tabatin un aporte grandi na e organisashon di HOPE 2015. Laga nos sigui Help Others Persevere and Excel den 2016 tambe.
