Djadumingu dia 23 Fundashon Pro Bista a organisá un tremendo Knock out di Domino. Nuebe team di dominó a kompetí kontra otro pa wak ken lo a sali kampion di e aña aki. Tur hende tabata ke wak si nan por gana e kampion nan di e delaster añanan pero esaki no a logra. Los Amigos a bolbe titulá kampion pa di kuater aña konsekutivo. Na di dos lugá a resultá dominó team Igual. Esaki ta un team ku ta konsistí di kliente di Pro Bista ku huntu ku nan boluntarionan ta kompetí profeshonalmente rònt Kòrsou. Na di tres lugá a resultá MCB. E pareha ku a pasa sapatu blanku tambe a risibí un premio. Esakinan a resultá Marcel Isberta i Elsio Delanooy, di e team di Wilhelmina Fonds. Ambiente tabata hopi dushi riba e djadumingu aki. Despues di Dominó tabatin un tremendo Karaoke. Pro Bista por mira bek riba un aktividat eksitoso i otro aña lo tin e knock out un bes mas pa tur ku no a logra partisipá.