Djadumingu dia 17 Fundashon Pro Bista a organisá un tremendo Knock out di Domino. Shete team di dominó a kompetí kontra otro pa wak ken lo a sali kampion di e aña aki. Tur hende tabata ke wak si nan por gana e kampion nan di e delaster añanan pero esaki no a logra. Los Amigos a bolbe titulá kampion pa di tres aña konsekutivo. Na di dos lugá a resultá dominó team Igual. Esaki ta un team ku ta konsistí di kliente di Pro Bista ku huntu ku nan boluntarionan ta kompetí profeshonalmente rònt Kòrsou. Na di tres lugá a resultá Kumpli ku Ne. Komo e team mas disiplina a resultá  grupo Kumpli ku Ne. Mester bisa si ku tur team a kumpli ku e reglanan stipulá, pero Kumpli ku Ne a destaká un tiki mas.E pareha ku a pasa sapatu blanku tambe a risibi un premio. Esakinan a resultá Farahnaz Antonia i Mickael Lagadeau, di e team Los Amigos. Ambiente tabata tremendo riba e djadumingu aki. Pro Bista por mira bek riba un aktividat eksitoso i otro aña lo tin e knock out un bes mas pa tur ku no a logra partisipá. Fundashon Pro Bista ta un instansia parsialmente supsidiá ku e meta pa integrá personanan sin bista i esnan ku limitashon visual den nos komunidat i krea asina mihó kondishonnan di bibá i di bida  pa e grupo aki. Fundashon Pro Bista ta organisá anual mente nan Luna di Buzon, p’asina yega na fondo pa realisá diferente proyekto pa su klientenan. E aña aki, Fundashon Pro Bista ta kumpli 15 aña i nan ke pone énfasis riba esaki. Den e 15 aña nan ku a pasa, nan a logra yega na 15% di e poblashon ku tin problema ku bista i e meta ta pa por yega na 25% i mas. Pa esaki mester di fondo pa por kubri e gastunan. E fondo nan ta sirbi pa hasi e Fundashon mas konosí den komunidat i asina yega na e klientenan ku Pro Bista ke alkansá. Ademas ku e fondo nan rekoudá, Pro Bista ta logra hasi mas ku e klientenan i bira tur dia di nobo mas profeshonal

Sigui krese ku nos!