E konosido restorantnan Karakter i Koraal na Coral Estate resientemente a sera un areglo di penshun kolektivo serka ENNIA pa nan empleadonan ku ta den servisio kontinuo. Esaki ta algu spesial, pasó hopi empleado den hóreka no ta akumulá un penshun, tanten hóreka tòg ta un di nos pilanan ekonómiko mas importante. Doñonan di e restorantnan, Jorrit i Marleen Hekelaar ta konsiente ku éksito di nan restorantnan ta dependé di un koperashon estrecho ku hinter e tim. I ku ta alkansá kalidat i servisio invertiendo den e hende. P’esei nan kier a logra un bon areglo di penshun pa nan empleadonan.

“Nos ta haña importante pa nos personal por akumulá un penshun adishonal. Pa esaki, huntu ku ENNIA su eksperto di penshun nos a krea un areglo di penshun kolektivo. Asina ora nan yega edat di penshun, banda di AOV nan ta risibí un penshun adishonal ku nan a akumulá huntu ku nan dunadó di trabou.” sigun Marleen Heekelaar di Karakter. “Komo dunadó di trabou nos ta sinti e responsabilidat pa pensa tokante futuro di nos personal.”

Kondishon pa esaki ta sí ku e personal tambe ta kontribuí na akumulashon di nan penshun. Pa nan mes kontribushon nan por a skohe entre 1% te un máksimo di 3% di e salario brutu. Por dedusí e parti akí fiskalmente tambe. Komo dunadó di trabou nos tambe ta kontribuí ku 3%, “ Jorrit ta añadí.

Remarkabel ta ku tur empleado ta partisipá den e penshun i ku nan tur a skohe pa un kontribushon máksimo. Pa Jorrit i Marleen esaki ta un èkstra prueba ku e empleadonan a apresiá nan oferta”, sigun Arie Groothuis di ENNIA

“M’a tende ku nan tabata trahando riba algu i mi ta hopi kontentu kuné,” Noeki ta konta. E ta traha komo waiter den e empresa. “Mi ta hañ’é un bon inisiativa i e ta duna mi trankilidat pa ku mi penshun. Den esfera privá ta masha difísil pa mi mes regla esaki. Naturalmente m’a skohe mésora pa e kontribushon máksimo pasó esei ta finansieramente interesante.” E areglo di penshun kolektivo di Karakter ta konsistí di un entrada pa e empleado despues ku e yega edat di penshun i un pago pa su famia den kaso ku e  fayesé promé ku e yega su fecha di penshun.