WILLEMSTAD —  E siman aki dos representante di Airbus tabata na Kòrsou pa un bishita di trabou serka AVA Airways. Ta trata aki di Srsnan Gonzalo Ramos Garzon ku ta e Sales Director pa Latino Amérika i Karibe i tambe Ismael Gomez Martin ku ta e Expectra of Behalf of Airbus Marketing Division. Nan bishita tabata unu pa follow up di un análisis di ruta ku Airbus a hasi aña pasa di  e businessplan di AVA Airways. Ta trata aki di un tremendo análisis di ruta ku Airbus a hasi na momentu ku e kompania kuminsá operá i kon su futuro lo bai ta. Durante di e enkuentro ku a tuma lugá, tabata presente e Chairman di AVA Airways, Sr. Olivier Arrindell i tambe Presidente di e board, Sr. Giovanni Atalita. AVA Airways a duna e representantenan di Airbus  e último detayenan relashoná ku e proseso di pèrmit ekonómiko ku ya nan tin 14 luna ta warda. Sr. Olivier Arrindell a mustra ku e CEO di AVA Airways lo ta un persona ku vasto eksperiensha  i agresivo den mundu di aviashon ku konforme e businessplan mester guia e kompania na su éksito. E mesun kos ta konta ku e personal tòp ku lo ta ekspertonan den kada área, ku lo mester garantisá éksito dje kompania. Manera ta konosí, konforme e businessplan di AVA Airways, lo bai hasi uso di e avion Airbus 319/20.  Ta trata aki di un avion di 156 asiento ku ta bon pa e rutanan den Karibe i tambe Sao Paulo ku ta un dje rutanan atraktivo dje kompania. Gonzalo Ramos Garzon i Ismael Gomez Martin a duna un splikashon ku e avionnan aki fásilmente por yega e destinonan aki for di Kòrsou, pero na e mesun momentu a duna un splikashon di A320 neo ( new engine option) ku ta super mas ekonómiko na kombustibel. E reunion entre e dos representantenan di Airbus i tambe e dos representantenan di AVA Airways tabata unu positivo. Airbus a bisa ku nan ta pendiente pa AVA Airways por keda kla ku su pèrmit ekonómiko, pa despues pasa pa e siguiente paso ku ta Akreditashon di e avionnan. Airbus ta kla pa duna tur su koperashon.