WILLEMSTAD – Renaissance Wind Creek Curaçao Resort ta risibí notisia alentador i ta kontentu di anunsiá ku e’la gana e award pa “Hotel Of The Year” di region Caribe i Latinoamérika (CALA). E rekonosementu aki ta keda otorgá na e hotèl ku a risibi e skornan di mas haltu pa e.o rekomendashonnan di huéspet, un RPI haltu, esaki ta un fórmula usá pa determiná si e hotèl ta yegando su ganashi pronostiká den komparashon ku otro hotèlnan den su kategoria, i e kantidat di miembronan Bonvoy ku ta registrá na e programa di lealtad di e kadena di hotèlnan Marriott. Tur aña hotèlnan ta risibi un ‘target’ pa esaki. Ademas un bes mas e tim kompletu a sá di destaká ofresiendo servisio ekselente na tur bishitante di e resort. Sr. Raymond Semeleer,  Hotel Manager pa Renaissance Wind Creek Curaçao Resort, a felisitá su koleganan bisando, “Un rekomendashon di un huéspet pa otro ta únikamente posibel si su eksperensia tabata inolvidabel, e award aki ta konfirmá nos dedikashon pa tur bishitante tin un eksperensia úniko na nos hotèl. Un pabien na henter e tim pa boso empeño i pashon pa semper duna e mihó! Gana ‘Hotèl di Aña’ pa CALA ta un logro di un ekipo disipliná, i inspirá i ku semper ta pone su trabou na promé lugá. Pabien! ”

Adishonalmente, Renaissance Wind Creek Curaçao Resort a keda nominá pa “Best Caribbean Resort” di USA Today 2023 su 10 Best Readers’Choice Travel Awards. USA Today ta un di e korantnan ku mayor sirkulashon na Merka. Tur aña di nobo mediante votashon ta duna rekonosementu na hotèlnan ku ta ofresé servisio ekselente den Karibe. Resientemente a anunsiá e nominadonan i a habri votashon. Por vota pa  Renaissance Wind Creek Curaçao Resort tur dia, te ku 19 di Desèmber via e link: https://www.10best.com/awards/travel/best-caribbean-resort-2023.