Ambiente cultural, musica y baile for di 6:30 di atardi

ORANJESTAD – MRT– Aruba ta den gran expectativa pa su dia di Himno y Bandera. Un dia pa demostra patriotismo y e manera unico cu nos como Arubiano ta celebra e dia aki. Renaissance Marketplace ta invitabo pa celebra dia di Himno y Bandera riba diasabra dia 17 di Maart proximo cu presentacion di grupo di baile folklorico, grupo ritmico, cuminda local y mucho mas!

Pa dia 17 di maart venidero, Renaissance Marketplace a prepara un evento special como celebracion pa nos Himno y Bandera. Ta cuminsa pa 6:30 di atardi cu animacion di Rincon Boyz y baile folklorico di Popcorn Dancers. Pa muchanan tin un skina di arte, Dino Jump, popcorn y suikerspin. Disfruta di e ambiente cultural mientras cu ta sinta come na un di e restaurantnan den Renaissance Marketplace. Ta sigur cu e cushina tipico di Aruba lo ta e accento principal durante e celebracion di diasabra awor 17 di maart. Corda haci reservacion si ta desea di sinta den cualke restaurant durante e celebracion. Ta un tradicion cu Aruba ta scoge pa celebra Himno y Bandera hunto cu Renaissance Marketplace. Sinta of cana den fresco y disfruta di e brisa suave di nos isla. Renaissance Marketplace ta invita henter comunidad pa celebra dia di Himno y Bandera diasabra venidero. Nos ta warda’bo!