Dushi cuminda, musica, arte y un ambiente sin igual!

ORANJESTAD – JULI– Diasabra dia 7 di juli proximo, amantenan di dushi cuminda y platonan suculento ta topa na Renaissance Marketplace. Ta dia pa Food Festival! Join e ambiente di Renaissance Marketplace Food Festival for di 6’or di atardi y disfruta di platonan internacional y naturalmente delicianan local. Ademas di esaki, expande bo horizonte y admira arte di nos artistanan local. Nan lo expone piesanan di arte exclusivo y tambe joyas traha na man. Lo tin musica di DJ y presentacion di ‘live’ riba escenario principal dilanti Café The Plaza y tambe riba escenario dilanti Casa Tua. Cana, relaha y disfruta di un anochi ameno y cu hopi accento culinario. Purba di diferente cushina y experencia ‘live cooking’ y diferente ‘tastings’.

Renaissance Marketplace ta combina e experiencia di un plasa aire liber cu un accento culinario. Durante dia e ta vibrante cu un variacion amplio di establecimento pa shopping, y ta ofrece oportunidad di desayuno y lunch. Mas atardi pa anochi e plasa tin un ambiente apart, cu entretenimento bibo y diferente restaurant cu ta ofrece platonan local y internacional creando un fucion fantastico pa un anochi yen di parentesis. Renaissance Marketplace ta invitabo pa su Food Festival riba diasabra dia 7 di juli proximo.