Fondonan a bay pa Mary Joan Foundation y Stichting BOB

ORANJESTAD – JAN– Den luna di december ultimo Renaissance Marketplace tabata ‘the place to be’ y a ofrece Aruba un experencia unico durante di su ‘Winter Wonderland’. Grandi y chikito a disfruta di presentacionnan di Las Unicas, Robert y Su Solo Banda Show, Claudius Philips & OREO, Grupo di Betico y otro agrupacionnan musical cu a compaña e ambiente di fin di aña na Renaissance Marketplace.

Manera tur hende sa, e aña pasa e Ice Skating Rink tabata tin un proposito masha special atrobe. Mary Joan Foundation y Stichting BOB tabata encarga cu e maneho di e popular Ice Skating Rink y tur loke a wordo genera for di e.o huur di sapato a bay pa e fundashonnan.  Di e manera aki Renaissance Marketplace a bolbe crea un parentesis den e dianan di fiesta y ta subraya nan compromiso cu e comunidad di Aruba.  Tabata diaranson merdia cu sra.  Arabella Colina, presidente di Mary Joan Foundation y sra. Diantha Nuesch di Stichting BOB a ricibi nan donacion for di ehecutivonan di Renaissance Marketplace.

Danki Aruba! A recauda 8927.80 florin total

Aruba a gosa di e nochinan di compra den e Winter Wonderland di Renaissance Marketplace. Danki na generosidad di tur cliente por a yuda ambos fundacion recauda fondo. Mientras cu Stichting BOB lo tin bon uzo pa e fondonan den nan trabou di conscientisacion riba e importancia di un mammogram pa e muher Arubano, Mary Joan Foundation por sigui sostene tur pashent cu ta pasando den e trayecto dificil cu cancer na pecho ta trece cu’ne. Ademas, nan lo uza parti di e donacion pa nan proyecto nobo “Un peluca, Un Sonrisa”, na unda ta traha peluca pa e pashentnan.