A prepará un evento grátis pa henter famia!

WILLEMSTAD –  NOV 2019- A kuminsa sinti Pasku den tur skina di Kòrsou i na Renaissance Mall & Rif Fort tambe e trabounan ta tumando lugá! Djaweps awor dia 21 di novèmber, lo sende lusnan di e dekorashon di Pasku ku tur aña di nobo ta yena nos kurason ku húbilo. Anualmente e dekorashon na Renaissance Mall & Rif Fort ta laga tur hende babuká ku su beyesa; e aña aki e ambiente lo start for di 5’or di atardi nèt despues di estreno di pelíkula Frozen 2! Lo sende lus i dekorashonnan di Pasku eksaktamente 7’or di anochi. Kòrsou ta invitá!

Estreno di Frozen 2 i ambiente di Pasku!

Renaissance Curaçao ta invitá mayor i yu pa estreno di Frozen 2 ku lo tuma lugá riba 21 di novèmber na The Movies den Otrobanda. E promé funshon lo ta 3’or di atardi, siguí pa un otro 4:30 pm i mesora despues lo tin ambiente navideño! Karchinan ta optenibel na The Movies Otrobanda pa únikamente 1390 Fun Miles (òf 555 Miles + f 15), i ta inkluí un combo spesial ku pòpkòrn i limonada. Tambe optenibel, ta un combo ku un peluche di Olaf- e popular karikatura di sneu den e pelíkula. Loke wòrdu generá na entrada lo bai komo donashon di Fun Miles i The Movies na Children’s Museum Curaçao!

Manera ku e último funshon di Frozen 2 tèrminá lo sigui ku presentashon di koro Kòrsou A La Belcanto ku lo deleitá un i tur ku ta hasiendo nan paseo navideño ku kansionnan popular di e temporada aki. Lo tin suikerspin i chukulati kayente. Tambe, muchanan por saka potrèt ku Elsa, Olaf i otro personahenan di Frozen. Lo tin un stènt spesial di Starbucks na unda por disfrutá di bebidanan netamente pa e temporada aki. No pèrdè e wega ku ‘bala di sneu’ ku muchanan di Children’s Museum Curaçao. Saka bo foto ku Fun Miles i gana premio!