ORANJESTAD – OCT– Recientemente Renaissance Mall a tene un evento di introduccion pa conciërgenan di diferente hotel y operadornan di tour cera conoci cu establecimentonan cu tin den mall.  Por a conta tambe cu representacion di ATA. Maneho di Renaissance Mall ta haci esaki pa informa conciërgenan di detayenan cu ta relevante pa e bishitante. Na momento cu e turista pidi pa informacion na e conciërge di nan respectivo hotel, e persona ta ekipa cu tur detaye pa sirbi e turista mihor. A duna diferente informacion, for di establecimentonan y restaurantnan cu Renaissance Mall ta ofrece te na detayenan mas specifico di marcanan renombra cu ta obtenibel.

Hopi tabata e establecimentonan di Renaissance Mall cu a participa na e evento aki; un danki ta bay na Louis Vuitton, Prada, Gandelman, Colombian Emeralds, Michael Kors, Aruba Aloe, The Mask, Pier Market, Starbucks, Cocosol, Gucci, D&G cu a percura pa cada conciërge participante ricibi un tas cu material di informacion y un muestra di aprecio. Ademas di e presentacion, e grupo di conciërge a ricibi un tour den e Mall na unda por a haci diferente pregunta cu despues lo resulta util pa e turista. Renaissance Mall ta gradici tur conciërge y nan respectivo hotel, tambe ATA i operadornan di tour pa nan participacion. Riba fotonan adhunto por haya un imprecion di e evento.