WILLEMSTAD –  Renaissance Curaçao Resort & Casino i Wind Creek Hospitality ta masha orguyoso di su tim kulinario i bartènder ku resientemente a forma parti di e CHATA Culinary Team.  Huntu ku demas kolega nan a pèrkurá pa un tremendo presentashon ku a kontribuí na 9 medaya pa Kòrsou. “Nos ta konsiderá masha importante pa rekonosé esfuerso di nos empleadonan, spesialmente esnan ku ta bai e mia èkstra tur dia. Di e manera aki nos ta mantené nos empleadonan entusiasmá i involukrá den nan trabou. Risibí rekonosementu pa bo logronan ta un di nesesidatnan fundamental di kualke hende.  Dor di rekonosé logro di nos empleadonan, nos ta sostené nan desaroyo personal tambe i na mes momentu ta kumpli ku kresementu di e kompania i ekspektativanan ku tin pa esaki. Un pabien na chefnan Jévgeny Hasselmeijer, Jonathan Pietersz i Sjagnon Winklaar, i tambe bartènder Girainey Muskus ku nan bon trabou na Miami resientemente. Renaissance Curaçao Resort & Casino ta sumamente orguyoso di nan”, esaki di akuerdo ku sra. Maylin Trenidad, Gerente General di e resort.

Resientemente e Renaissance Curaçao Resort Culinary Team a logra bin kas ku medaya di plata den e kompetensia ‘overall’; medaya di bròns den e kompetensia ‘Beef’ (karni), pa chef Jévgeny Hasselmeijer i tambe un medaya di bròns den e kompetensia di ‘Pastry’ (Pasteleria) pa chef Sjagnon Winklaar. E kompetensia organisá pa Caribbean Hotel & Tourism Association (CHTA) na Miami ta sirbi komo un motivashon grandi pa tur talento lokal ku partisipá na dje. “Nos ta sinti nos mes orguyoso di por konta ku algun kolega asina talentoso i kreativo den nan trabou. Esaki ta prueba di nos dedikashon komo hotèl tambe, pa semper ofresé platonan di kalidat den tur nos restorantnan”, asina sra. Trenidad a finalisá.