…Djasabra 21 di febrüari último…

WILLEMSTAD –Febrüari 2015– Djaweps 19 di febrüari último komunidat chines a selebrá apertura di un aña nobo. Di akuerdo ku astrologia chines esaki lo ta e aña di kabritu. Renaissance Curaçao Resort i Carnaval Casino ta balorá su relashon ku e komunidat chines i komo muestra di apresio a organisá un selebrashon spesial huntu ku ‘Curaçao Chinese Business Association’ djasabra dia 21 di febrüari último den Renaissance Curaçao Resort su Atrium ‘ballroom’. Durante e selebrashon Carnaval Casino huntu ku ‘Curaçao Chinese Business Association’ a prepará un skema yená ku aktividatnan ameno pa garantisá un anochi eksitoso. For di entretenimentu bibu, show di moda, show di magia te na karaoke. Carnaval Casino a pone atenshon spesial riba tur detaye. Komo ku e aña di kabritu (Year of The Goat) ta un aña den kual kolónan maron, kòrá i lila ta sobresalí a sòru pa un dekorashon ku ta aksentuá esaki i a kombin’é ku un eksperensia kulinario na unda a suprayá e sabornan oriental. Carnaval Casino huntu ku ‘Curaçao Chinese Business Association’ ta kontentu di por a brinda e komunidat chines un selebrashon di aña nobo ku a konta ku gran parti di nan tradishon. Ta importante pa rekonosé e ròl importante ku e komunidat chines tin den nos sosiedat i den nos ekonomia. Carnaval Casino ta deseá e komunidat chines i ‘Curaçao Chinese Business Association’ un aña nobo próspero yená ku bon fortuna. Ku e aña aki trese hopi oportunidat i ku tur esfuerso keda kombertí den logro.