WILLEMSTAD – YÜNI – Resientemente Renaissance Curaçao Resort a hasi entrega di material deportivo na organisashon di Liga Pabou. Di akuerdo ku sra. Maylin Trenidad General Manager, duna un aporte na nos komunidat ta kuadra ku e filosofia di Renaissance Curaçao Resort & Casino, parti di Wind Creek Hospitality. Djárason último a hasi entrega di e.o 15 kaha di bala di beisbòl i ekipo pa catcher na Liga Pabou. Sra. Trenidad a komentá durante di e entrega di material, “Nos hóbennan ta nos futuro i mester aportá na nan desaroyo. Ku e gesto aki Renaissance Curaçao Resort i Wind Creek Hospitality ta pone akshon tras di palabra. Nos ta unánime den e pensamentu ku si un mucha/ hóben risibí formashon deportivo e lo tin mihó prestashon na skol, ta demostrá kompañerismo, tin disiplina i ta mas salú”. Manera ku fanátikonan di deporte sá, Liga Pabou tin 3 divishon den play-off lokal; Senior League, Little League i Minor League. Kada tim ta konsistí di 16 hóben deportista ku despues lo representá Kòrsou den Latin/ Caribbean Championshp aki na Kòrsou (Senior League), na Sto. Domingo (Minor League) i tambe na Puerto Rico (Little League).

Na final, sra. Trenidad a felisitá e organisashon di Liga Pabou, i su boluntarionan ku e tremendo trabou ku nan a bin ta hasi ku e muchanan. Anualmente mas o ménos 400 mucha, di entre 8 ku 15 aña di edat ta risibí entrenamentu i formashon den beisbòl i entre nan tin algun yu di empleadonan di Renaissance Curaçao Resort tambe. Renaissance Curaçao Resort i Wind Creek Hospitality ta deseá e organisashon hopi éksito pa e próksimo temporada.