Ken lo bira e mihor bartender di Aruba?

Celebrando e prome lustro di competencia di bartender

ORANJESTAD- SEPT– E di 5 edicion di Bartenders’ Brawl lo ta espectacular! E aña aki 9 bartender lo bataya pa bira e mihor bartender di Aruba, celebrando 5 aña di e competencia. E anochi di 25 di october proximo lo keda subraya pa curashi y creatividad, ora cu e bartendernan demostra nan superioridad den mixologia na Renaissance Festival Plaza. Bartendernan di La Cava, Pepia Est., Divino, Manrique Capriles, ATC, TEC y Tropical Bottling lo traha un mescla original cu meta pa bira e bartender mas popular di Aruba.  Lo saca 2 ganador; mescos cu añanan anterior bishitantenan di e evento lo vota pa e cocktail ganador y tambe lo saca un ganador di acuerdo cu puntuacion di hurado. 

Disfruta di un anochi chic riba Festival Plaza y ricibi diferente ‘bites’ pa acompaña e cocktailnan cu ta inclui den e carchi pa e evento. E ‘bites’ nan prepara pa e team culinario di Renaissance sigur lo complementa e cocktailnan durante di e Bartenders’ Brawl. Carchinan di entrada ta obtenibel pa $55 (p.p) y ta inclui 9 cocktail- 1 cocktail di cada participante, ‘heavy bites’ y ‘live entertainment’. Pa e ultimo cuater añanan e competencia entre e bartendernan participante a bira un show total!  Renaissance Aruba, anfitrion di e Bartenders’ Brawl 2019 ta invitabo pa cumpra bo carchi na e Navigator’s desk.  Bishita e pagina di facebook di Renaissance Aruba pa mas informacion. Let’s get ready to rumble!