Pa nos di Magic Of Creativity (M.O.C.) en koperashon ku Sentro di Bario Montaña (S.B.M.) i Komishon Edukashon i Rekreashon Kultural (K.E.R.K.) ta un inmenso plaser pa aserka boso di prensa ku e siguiente proyektonan kultural kual ta e promé edishon di Reina, Prens i Pancho Banda Ariba 2016 i un “Mid-Year Carnival Parade”, kual su inisio lo bai ta na aña 2017 i pa sigui ku nan den futuro. M.O.C., S.B.M. i K.E.R.K. ta organisashon nan profeshonal ku a bini huntu i ku ta para pa e Magia di Kreatividat. Despues di a analisá e desaroyo di nos karnaval i e elekshon nan durante di e aña nan tras di lomba, nos a yega na e konklushon ku poko poko luho a apoderá di nos karnaval i elekshon nan, hasiendo e partisipashon na e aktividat nan aki mas kostoso. Debí na e desaroyo aki, nos di M.O.C., S.B.M. i K.E.R.K. a haña ta apto pa ban bek na inisio kaminda kreatividat tabata e base di tur kreashon i partisipashon di nos pueblo na su fiesta kultural ku ta karnaval. Kaminda bario nan tabata uni i kompetí na un manera sano kontra otro. I asina duna balor i stimulá nos pueblo pa ban laga kreatividat bria bek den nos kultura i asina halsa e partisipashon na nos evento nan kultural. Nos ta un pueblo kreativo i ku sa di balorá kos bon, p’esei a yega e ora pa nos ban reskatá nos balor nan di kreashon i no laga ku e parti finansiero tin ku resaltá riba e don ku Dios a duna nos. Pa es motibu nan ariba menshoná nos di M.O.C., S.B.M. i K.E.R.K. huntu ku bo(so) di prensa di Kòrsou i e bario nan di Banda Ariba ke pa nos ban rebibá nos balornan ku ta bai pèrdí. I alabes nos ta kier a pidi boso pa duna nos un man pa realisá e proyekto nan aki, kual lo yuda promové nos kultura i spesialmente nos karnaval di Kòrsou. Nos ta sigur ku e eventonan aki lo resultá inolvidabel pa pueblo di Kòrsou en general. I e eksperiensha ku Kòrsou lo biba promé, durante i despues di e sertámen nan i e “Mid-Year Carnival Parade” lo duna frutanan valioso pa futuro. Pa e elekshon Reina, Prens i Pancho Karnaval Banda Ariba na 2016 nos di M.O.C., S.B.M. i K.E.R.K. ta hasiendo nos máksimo esfuerso pa brinda Kòrsou un sertámen di un nivel haltu, kaminda kada partisipante lo sinti nan orguyoso di a forma parti di e espektákulo karnavalesko kultural aki. Pero pa logra esaki, nos mester por konta ku boso koperashon òf sosten. Laga nos ban pone man huntu i demostrá ku nos ta persona nan ku un grado haltu di responsabilidat, kreatividat i dedikashon pa nos pueblo. I ku huntu nos por engrandese karnaval di Kòrsou i su kultura. Ya asina na final huntu nos por mira atras i afirmá ku proyekto Reina, Prens i Pancho Karnaval di Banda Ariba na 2016 i e “Mid-Year Carnival Parade” na 2017 tabata un eksperiensha MÁGIKO. “Reina , Prens i Pancho  Karnaval Banda Ariba “ 2016 Elekshon nan:

• Reina, Prens ku Pancho Banda Ariba Talento: 20 desèmber 2015.

• Elekshon Reina, Prens i Pancho Karnaval Banda Ariba: 24 yanüari 2016.

Reglanan pa partisipá na Elekshon Reina, Prens i Pancho 2016

Mucha muhé:

• 18-35 aña
• Mag di tin yu
• No ta obligá di ta mara na un grupo di karnaval

Mucha hòmber:

• 18+ aña
• Mag di tin yu
• No ta obligá di ta mara na un grupo di karnaval

Inskripshon:

• A habri 14 òktober 2015
• Ta sera 31 òktober
• Por yama 685-0475 òf 518-8233
• Na nomber di nos miembro nan di direktiva M.O.C., S.B.M. i K.E.R.K.:

Hubert “Juni” Aniceta (Presidente / Project leider) Yves “Payo” Schoop (Vise Presidente)Linuska “Poppy” Bernadina (Komisario General)