Despues di un proseso di selekshon basta largu diestres alumno a sigui e kurso pa Movements Operator ku a kuminsá dia 5 di yüni 2012. Pues e programa di entrenamentu a dura 24 luna, un poko mas kòrtiku ku otro kursonan pa operator ku normalmente sa dura 36 luna. E estudio pa Movements Operator ta un poko distinto na komparashon ku esun di prosès operator ya ku e no ta kontené materianan manera “process technique” i “combustion”. E funshon di Movements Operator mas bien tin di haber ku movementu di produkto di planta pa tanki, di tanki pa tanki, barku pa tanki i visa versa. Esaki ta rekerí ku e Movements Operator mester tin bon konosementu di e produktonan ku Isla ta produsí i eksportá i di sistemanan kompliká di tubería ku Isla ta kontené pa evitá kontaminashon di produkto. Un faktor masha importante ku mester tene kuenta kuné ta kontaminashon di awa i tera. P’esei, énfasis riba esaki ta wòrdu poné den e materia di Medio Ambiente. Djarason 28 di mei, den presensia di miembronan di gerensia di Isla, instruktornan i famianan e alumnonan a risibí nan diploma komo prueba di a sigui e kurso ku éksito. E sentido di responsabilidat, seriedat i dedikashon ku e alumnonan a desplegá durante e periodo ku a pasá sigur ta bale la pena resaltá. Isla lo sigui habri oportunidat pa hóbennan responsabel i ku dedikashon por haña un trabou ku sin duda lo kontribuí na desaroyo di nos ekonomia. Dia dos di yüni próksimo e grupo di Movements Operator lo drenta servisio di Refineria Isla. Un pabien ta bai na e 13 alumnonan aki. Skol Vokashonal di Refineria Isla ta deseá nan hopi éksito den nan karera nobo. 
Aki ta sigui un lista di nòmber di e respektivo alumnonan.
Alexander Gijsbertha : Mihó resultadonan
Tyrone Sophia : A resaltá mas den aspektonan ku tin di haber ku Hende i Trabou na OPS
Frits Burgzorg : A resaltá mas den aspektonan ku tin di haber ku Hende i Trabou na OPT
Donovan Genaro Christiaan, Hulio Ricardo Christina, Raychell John Doran, Raylis Leandro Ellis Girigorie, Girion Gildrick Rogato Hooi, Raymond Thomas Frans Janga, Christopher Farric Anthony Langguth, , Aldrin Jacob Muzo, Jean Alexandré Melanio Pauletta, John Albino de Ponte.