Ronella Tjin Asjoe-Croes na ocasion di develo di Monumento Ike Cohen

Nan vision ta un parti grandi di e hecho cu awe nos ta ricibi mas di 1 miyon turista pa aña

ORANJESSTAD, Aruba – 16 di februari 2016: “Desde cu nos isla a drenta Status Aparte 30 aña pasa, ta hopi reto nos a confronta. Di un dia pa otro nos mester a cambia nos enfoke di un industria petrolero pa turistico”, asina Ronella Tjin Asjoe-Croes, Chief Executive Officer di Aruba Tourism Authority a inicia su discurso na ocasion di develo di e Monumento Ike Cohen situa riba Plasa Turismo. El a corda tur hende, cu no tabata algo facil, pero hopi hende e tempo ey a pone schouder bou di e causa cu awe nos por ta orguyoso di yama mas di 1 miyon turista bonbini na nos isla tur aña.

Di acuerdo cu Ronella Tjin Asjoe-Croes, tin un dicho Arubiano cu ta bisa ‘Experencia bo ta cumpra na pacus di hende bieu’. Claro cu e proverbio no tin nada di haber cu edad di hende, sino mas bien cu experencia di hende. Y ta nifica cu e generacion nobo, tin hopi pa siña y tuma for di e experencia amplio di esunnan cu a traha prome cu nan, cu a logra otro exitonan prome cu nan y cu ta e grupo cu den cierto forma, a construi e fundeshi solido riba cual nos ta sigui construi awendia.

“Nos ta aki awe pa celebra inauguracion di monumento Ike Cohen. E monumento aki ta mas cu djis un honor na Ike Cohen. E ta tambe un honor na tur otro cu, di un of otro manera, sea den hotel, sea den restaurant, sea den tour, sea den vision… tur cu nos ta considera un pionero den turismo”, asina Ronella Tjin Asjoe-Croes a conta.

Cada un di e personanan cu a expone nan nomber riba e monumento aki a hunga un papel crucial den turismo di nos pais. Un pionero ta un persona cu ta reconoce potencialnan, un innovador cu ta capaz di purba cosnan nobo, ta pusha e limite pa por logra un causa of idea of hasta pa kibra un record. Y den e grupo aki, tur ta pioneronan den nos industria turistico… nan ta arkitectonan clave di e exito di nos turismo.

Nombernan manera Juancho Irausquin, Oscar Henriquez, Wichi de Palm, Ike Cohen, Raymond Maduro, Eduardo de Veer, Harold Malmberg, Ramon Richardson, Eline Bartels-Daal, Louis Pavlis, Charlie Brouns Jr., Joy Kock, Lloyd Jean-Baptiste, Manchito Ponson, Chaiben Neme, Morris Neme, Eduardo Ellis, Simon Oduber Jr. y Ewald Biemans… tur ta personahenan cu di un of otro forma a aporta na crea e industria turistico cu awe ta e pilar economico di mas importante di nos isla.

Un otro dicho Arubiano ta bisa ‘Ningun hende no ta profeta den su tera’, cu ta nifica cu hopi bes na cas mes no tin aprecio pa e trabounan realisa. Nos sin duda lo no permiti esaki sosode. Ta pesey mes, Aruba Tourism Authority conhuntamento cu Ministerio di Turismo, ta mustra cu ta contento y ta celebra nos logronan y cu orguyo nos ta reconoce tur cu a traha duro, cu sodo di nan frenta, pa awe nos ta unda nos ta.

Cu e monumento aki awe nos kier percura pa e nombernan aki ta bon graba y cu e generacionnan nobo por siña y cu nos bishitantenan por conoce mas di nos desaroyo turistico.

Ronella Tjin Asjoe-Croes a indica tambe; “Manera boso por nota e monumento aki ta brinda e espacio pa otro pioneronan cu a, ta y lo ta di significacion grandi pa nos turismo, pues ta e intencion pa sigui expande esaki.” El a sigui bisando “Mas cu e monumento aki, awe mi kier yama cada un di nan DANKI. Y na esunnan cu no ta cu nos mas, na nan famia, DANKI!… Danki pa permiti cu boso ser keri ta un di e arkitectonan di nos desaroyo turistico di nos isla.”