Boluntarionan ta obsekiá buki na hoben i ta entretené nos grandinan

Willemstad – Boluntarionan di RBC Ban Yuda Komunidat (BYK) ta keda aktivo den nos komunidat ku proyekto pa hoben i grandinan. RBC BYK ta organisá diferente proyekto tur aña i ta promové e filosofia di duna bek na komunidat serka tur empleado den banko i asina konhuntamente ta yuda varios kousa den nos komunidat. E organisashon di RBC resientemente a hasi un donashon grandi na Sta. Clara School di paketenan di 7 diferente titulo di buki di Fundashon Editorial Sembra Buki, skibí na tantu Papiamentu i Hulandes den e diferente nivelnan di enseñansa di Fundeshi. Ku entrega di e bukinan RBC ta kontribuí na amplia e kolekshon di buki den biblioteka di skol, alabes nan lo wordu usá komo parti di e kurikulo eskolar. Ta un echo ku enseñansa ta eksperensiá un eskases na buki en partikular bukinan den konteksto di nos isla i kultura.

Otro proyekto bunita ku ta ripití tur aña ta esun kaminda boluntarionan ta duna atenshon spesial na nos grandinan riba nan dia, 1 di oktober. E aña aki a toka turno na grandinan di kas di kuido i pasadia Marviluz na Souax. Komo parti di e selebrashon di Dia internashonal di Hende Grandi, boluntarionan di RBC a soru pa deleitá e grandinan ku un mainta di musika di Kaha di Orgel, refresko, bolo i algun pasapalos pa nan sinti nan mes berdaramente den ambiente festivo.

Durante di henter aña RBC BYK ta demonstrá su kompromisio na gruponan den nos komunidat ku mas mester di e sosten. Boluntarionan di RBC BYK ta komprometé na yuda pa asina kontribuí na un mihó bienestar p’e gruponan aki den nos komunidat. Ku trabou boluntario i aporte finansiero e organisashon ta duna bek na nos komunidat kaminda nos ta traha i biba.