Sosiedatnan di boluntario di RBC ta sera kabes pa hasi donashon

Willemstad – kolaborashon entre trahadónan ta sòru pa un influensha positivo den nos komunidatnan i alabes ta enrikesé bida di nos hendenan riba diferente manera. Un di e Employee Resource Groups (ERG) di RBC – e Caribbean Women ERG – resientemente a kuminsá ku un gran inisiativa den hinter region di Karibe kaminda ta parti tas di lomba pa muchanan di skol i organisashonan selektá. E muchanan tabata sumamente kontentu ku nan tas di lomba nobo i a keda hari so!

Na Kòrsou nos ERG-team a traha huntu ku e grupo di boluntario di RBC/BYK (Ban Yuda Komunidat) pa entregá tas di lomba na un grupo impreshonante di hoben ku ta aktivo riba tereno di karate. Studiantenan selektá di tres di e seis skolnan di karate na Kòrsou a risibí un tas di lomba di RBC. E edat di e atletanan tabata varia entre sinku aña pa 17 aña. “E echo ku nos por rekompensá e atletanan spesial aki – ku ta trein tres pa kuater bia pa siman – ta yena nos ku alegría. Ta bunita pa mira kon algu asina chikí por trese un sonrisa asina grandi”, asina Lillian van der Burg-Goeloe, e representante di Caribbean Women ERG na Kòrsou, a duna di konosé.

“RBC ta konosí pa su enbolbimentu den diferente bon kousa den komunidat. No ta importá kon grandi òf chikí; enbolbimentu i alabes dunando un aporte na un bon kousa den e komunidat, na final semper lo sòru pa un gran impakto”, Pierrot Hurtado di RBC a bisa.