E úniko banko na Kòrsou ku ta ofresé su klientenan komersiante un alternativa inovativo pa e sistema di pago di tarheta di krédito.

WILLEMSTAD –  7 di desèmber 2015: Kliente komersiante di RBC Royal Bank awor tin e posibilidat pa ofresé su klientenan un sistema di pago nobo.  Ta trata aki di e produkto RBC EZPay. Durante un konferensha di prensa ku a tuma luga awe, Pierrot Hurtado – Country Manager di Kòrsou i Bonèiru – a indiká ku e produkto aki ta ofresé klientenan komersiante di RBC e ‘libertat pa aseptá pago di tarheta di krédito via un aparato wireless, hasiendo uso di un telefon inteligente òf un tablet.’

“RBC ta e promé banko na Kòrsou ku ta ofresé e produkto aki. Ta trata di un servisio sumamente kumbiniente i sigur ku nos ta ofresé nos kliente na un preis rasonabel. E produkto aki ta sòru ku negoshinan por keda ofresé servisio kontinuo, asta ora koriente bai. Djis download e app grátis, konektá e aparato wireless via Bluetooth ku bo telefon inteligente òf tablet di Apple òf Android i tur kos ta klá pa prosesá e pago”, asina Hurtado a duna di konosé.

RBC EZPay ta ideal pa negoshinan mobil, manera por èhèmpel taksista, kontratista, fotógrafo, personal trainers i mas!

E benefisionan prinsipal di e produkto nobo aki ta hopi pa negoshinan ku ta ‘on the go’:

• E posibilidat pa aseptá pago di tarheta di krédito tur kaminda i tur ora na Kòrsou
• Pagonan ta keda depositá direktamente riba bo kuenta di RBC Royal Bank Business; danki na e sistema aki e kliente no mester pèrdè hopi tempu ku asuntunan bankario.
• E kliente tin trankilidat sabiendo ku e ta mas seif i no mester kana ku sèn kèsh.

“Nos ta sumamente entusiasmá pa ku e produkto nobo aki ku lo yuda nos kliente oumentá nan entrada mas”, asina Hurtado a sigui bisa.

Genara Hanst-Villanueva, Merchant Sales Officer na RBC, a duna un demostrashon di e aparato pa mustra kon fásil e ta pa usa. RBC EZPay ta ofresé e mesun seguridat ku kualkier otro mashin di swaip. E usuario mester pone su firma riba e touchscreen pa asina e risibí su resibu via e-mail òf sms. Den futuro serkano, e aparato di RBC EZPay lo aseptá debitcard tambe.

En konekshon ku lansamentu di e produkto aki, RBC ta ofresé un promoshon spesial pa un tempu limitá. Entrante awe, 7 di desèmber, te ku dia 7 di mart, e promé 20 klientenan komersiante ku ta apliká pa e RBC EZPay na Kòrsou, lo risibí un aparato kompletamente grátis!

Pa mas informashon di e produkto di RBC EZPay i e kampaña di RBC por yama e liña di servisio di RBC na 7638438 òf tuma kontakto ku nos Merchant Sales Officer na 6907533.