Kralendijk – E tim di RBC Business Banking resientemente – den un tanda largu di seminario pa duna konseho i pa netwerk – a organisá un evenemento na Spice Beach. Ku esaki e banko ke ekspresá su apresio pa e kliente Boneriano i gradisí nan pa e negoshi ku nan ta hasi na e banko.

Esaki alabes tabata un bon oportunidat pa Russell Kopke, ku resientemente a wòrdu apuntá komo Area Vice President Business Banking pa Kòrsou i Boneiru, pa konosé kliente importante den un setting diferente. “Esaki ta mi di tres bishita na Boneiru i semper mi ta keda impreshoná ku e dedikashon di nos tim akinan. Esaki tabata un gran oportunidat pa mi sera konosí ku algun kliente importante i pa gradisí nan pa hasi nan negoshi na RBC”, asina Kopke a duna di konosé. “Na RBC nos enfoke ta pa krese huntu ku nos kliente – nan éksito ta nos éksito.”

E kliente a wòrdu entretené pa diskushonan informativo ku Kopke i Steven Coutinho, e managing director pa Dutch Caribbean. Otro koleganan di RBC tambe a laga e kliente sera konosí ku e aserkamentu di RBC.

E enfoke di RBC Business Banking ta pa duna e kliente konseho i servisionan eksepshonal dor di ofresé un eksperiensia diferente i e kliente a reakshoná positivo riba esaki. E klientenan ku tabata presente na Spice Beach a mustra satisfakshon pa e evenemento informativo ku a wòrdu organisá den un setting kaminda tabata posibel pa interkambiá di idea, netwerk i diskutí tokante projektonan nobo – kualnan ta aportá na e desaroyo na Boneiru.

Tambe presente na e evenemento di RBC tabata gezaghebber di Boneiru, Edison Rijna, i diputado di Turismo i Asuntunan Ekonómiko, Clark Abraham.