Boluntarionan di RBC Ban Yuda Komunidat ta limpia Boca Patrick

Willemstad – Yüni 2015 nos a selebrá RBC Blue Water Day. E aña aki tambe RBC ta motivá trahadónan pa forma parti di e ‘RBC Blue Water Makeover’ i ta puntra e trahadó di RBC rònt mundu pa yuda protehá awa dor di krea mas espasio bèrdè, yuda limpia kaya, alsera i kosta i konsientisá otronan tokante problematiko di awa urbano.

Pa kuminsá ku e luna di RBC Blue Water, trahadónan na Kòrsou a uni forsa ku Fundashon Uniek Curaçao i ku Carmabi pa limpia un di e hopi bokanan kantu di kosta di Kòrsou. Boca Patrick ta un di e bokanan aki ku ta keda na kantu Nort-Wèst di e isla kaminda olanan poderoso ta dal kontra e kosta, asina kreando un bista espektakular i un paisahe natural impaktante.

Desafortunadamente, hopi di nos kostanan, boca i formashon di piedra ta wòrdu impaktá dor di un akumulashon di shushi ku hende ta laga atras òf ku ta wòrdu bentá den laman i asina ta yega kantu. RBC a uni forsa ku Carmabi i Uniek Curaçao pa yuda limpia Boca Patrick pa e selebrashon anual di RBC Blue Water Day. E boluntarionan di RBC “Ban Yuda Komunidat”  ta konosí pa nan entusiasmo i nan abilidat pa forma un tim di kolega pa asina yuda ku e trabou boluntario. Nan a tuma medida mesora i e partisipantenan a hasi un tremendo trabou ku e limpiesa di e area di Boca Patrick. A deshasí di tur plèstik, tire, obheto skèrpi i otro material di shushi. Tambe e boluntarionan tabatin e oportunidat úniko pa traha huntu pa protehá nos medioambiente i preservá e area bunita aki di Kòrsou ku ta konosí pa trabou boluntario, biahenan di skol i tambe pa inbestigá e bida bou di laman.

RBC Blue Water Day ta un dia pa traha huntu i protehá awa den e komunidatnan kaminda nos ta biba, traha i rekreá. Aña pasá trahadónan di RBC a asistí na mas ku 750 makeover rònt mundu. E aña aki a surpasá e number aki.

Durante e limpiesa di Boca Patrick boluntarionan a kolektá 3.5 metro kubiko (ekivalente na 3 cruiser jeep full yená) di shushi. 25 Boluntario di RBC i diferente persona ku a representá Carmabi i Uniek Curaçao a hasi esaki durante tres ora intensivo di trabou.