Willemstad- yanüari 2015- Tabata djamars último ku staf i personal di KFC Brievengat a reuní pa selebrá 25 aña den servisio di Raymond Eugenia. Gerensia ta kòrda Raymond 25 aña pasá durante di su entrevista di solisitut, “Entre hopi solisitante, Raymond a sobresalí mesora. Nèchi i limpi bisti, manera e ta- te dia di awe. E dia pa solisitá pa trabou a tuma lugá na KFC Saliña bieu, Hanchi Makaku. Tabata den temporada di karnaval i Raymond a kuminsá traha mesora na KFC Colon. Einan Raymond a siña tur kos di e trabou, despues e’la pasa pa djòin e crew di Punda na unda ku e’la traha pa mas di 20 aña i awòki e tin 3 aña na KFC Brievengat. Raymond su trayektoria ku nos empresa ta unu ehemplar”, esaki di akuerdo ku sr. Gallego, Gerente General di KFC. Di akuerdo ku su superiornan nunka Raymond a pidi AO den tur e 25 añanan ku e ta den servisio. Raymond ta kuminsá traha 8’or- pero ya e tei for di 6’or di mainta wardando e gerente general habri porta p’e por kuminsá laborá. Sr. Gallego, Gerente General ta bisa ku e tin hopi rèspèt pa Raymond su trabou. Un trahadó ehemplar ku masha bon manera. Raymond mes ta splika di ta traha ku hopi smak i e ta ekspresá ku e ta stima su trabou, ”Trahando akinan mi por a sostené mi famia i yega na tur loke mi tin”. Entre abraso i sonrisa di su koleganan Raymond Eugenia a risibí un plakat komo mérito i rekonosementu pa su dedikashon i responsabilidat den su trabou. Koleganan ta unánime ora nan ekspresá ku Raymond ta un tremendo kolega i semper dispuesto na koperá. Riba fotonan athuntu momentu ku Sr. Gallego, Gerente General di KFC ta entregá sr. Raymond Eugenia e plakat komo rekonosimentu pa su trabou ehemplar durante di 25 aña. Gerensia i koleganan a uni nan mes na felisitá Raymond i ta ekspresá gratitut pa 25 aña di lealtat. Masha Pabien!