Digicel Business su rapòrt riba Transformashon Digital ta revelá ku apénas 29% di empresa tin Cyber Security aktualisá

Willemstad – Resientemente Digicel Business a publiká su Informe i Guia di Transformashon Digital, teniendo kuenta ku e trayekto di transformashon digital i impakto di e pandemia riba merkado. E rapòrt a hasi un enkuesta bou di 1,900 negoshi den Caribe i mediante e investigashon, Digicel Business a haña un mihó bista di na unda e kompanianan ta riba nan trayekto pa un transformashon digital i proveé algun opshon tangibel den kual organisashonnan por invertí. Adishonal di duna un bista den Caribe, Digicel Business a realisá un rapòrt pa islanan ABC, Barbados, Bermuda, British Virgin Islands, Cayman Islands, Jamaica, Saint Lucia i Trinidad & Tobago.

Algu ku a bin dilanti den e rapòrt ta ku ménos ku un tersera di empresanan enkuestá (29%) a ‘upgrade’ nan seguridat sibernétiko komo resultado di e pandemia. Ta importante pa suprayá ku e nivel i sifra di menasanan mundial pa loke ta atakenan sibernétiko a oumentá grandemente desde komienso di COVID-19. E oumento aki por wòrdu atribuí n’e echo ku hopi kompania a haña nan mes obligá pa implementá e trahamentu na kas den forma ‘remote’. Esaki den un intento pa protehá nan trahadónan di e impakto di e vírus. Awendia, den e terser aña di pandemia ainda tin hopi hende trahando na kas.

Mark Shoebridge, Direktor di Digicel Business a bisa: “Cyber Security ta un tópiko mundial i ta algu ku por tin un impakto devastador riba kualke hende, personalmente òf profeshonalmente, bo no mester ta un kompania grandi pa bira su blanko. Miéntras ku 77% di empresanan enkuestá den henter Caribe a aselerá nan strategia digital debí na e pandemia, e kresementu ku a bin despues komo resultado di e invershon den e transformashon digital, ta na peliger si e seguridat sibernétiko no keda aktualisá respektivamente.”

Organisashonnan ku no a tuma e prekoushon nesesario pa protehá nan informashon ta keda vulnerabel pa atakenan ku por ta katastrófiko. Mundialmente, ta rekonosé ku un atake sibernétiko ta sosodé kada 39 sekònde. Ta nifiká ku protekshon di data di tantu kompania i kliente ta imperativo pa mantené kualke negoshi operashonal dilanti menasanan ku semper ta presente.

Mark Shoebridge ta agregá: “Motibu ku nos a hasi e investigashon aki ta ku nos a ripará ku tin falta di informashon den industria reflehando spesífikamente empresanan den Caribe. Nos ta spera ku e informashon den e rapòrt aki por sirbi komo un guia pa kualke empresario ku ta kontemplá un transformashon digital i ku ta puntra nan mes kon ta e mihó manera pa hasi esaki…”

E rapòrt ta spesialmente pa empresarionan, lidernan den empresa i esnan ku ta responsabel pa tomo di desishon i ku ke mehorá nan konosementu riba Transformashon Digital i su benefisionan, pero tambe desafionan den nos klima empresarial aktual. E rapòrt ta optenibel, pa download grátis riba e wèpsait di Digicel Business https://www.digicelbusiness.com/digital-transformation.html