Pa algun tempu kaba mi tabata kana ku e aspirashon pa lanta un agrupashon musikal ku mi por krea, kompartí i realisá mas di mi ideanan musikal kuné. Esaki lo duna mi e oportunidat pa kristalisá mas di mi inspirashonan líriko i melódiko i asina krea músika na nivel i diferente. Mi konosé Archel Callister pa hopi tempu kaba i mi tabata sa ku e lo ta interesá den un konsepto musikal nobo, manera esun ku mi tabatin den mi kabes. Na su turno Archel a konta mi di e agrupashon musikal Tre’Chic ku a aserk’é ku e pregunta pa manehá nan. Tre’Chic ta un agrupashon musikal formá pa Ericson Adamus, kende a sa di buta un tremendo tim di músikonan lokal huntu pa asina hasi músika di un manera diferente. Komo banda nan tambe tabata aspirá un eksperensia nobo riba e tereno di músika. Archel na su turno a sa di trese nos tur huntu. Mi tabata konosé hopi di e músikonan kaba i ku mayoria di nan ya mi tabatin e plaser di a traha den pasado. Tre’Chic tabata ke un ‘sound’ nobo i hasi ‘entertainment’ riba un nivel kompletamente inovativo loke ta trata e aspekto di ‘show’. Ademas nan repertorio lo konsistí di músika totalmente variá. Pues Tre’Chic i ami tabatin e mesun vishon. I e opvio paso pa a tuma lugá tabata pa e músikonan di kaliber aki, ku e mesun pensamentu i ambishonan ku mi persona, sera kabes i hasi nos ideanan realidat. Finalmente pa kaba di kompletá e tim tabata falta dos kantante maskulino mas; dos ‘real gentlemen’. Formando parti di e farándula di Kòrsou ya mi tabata sa kaba di dos kantante super talentoso ku tambe tabata ke algu nobo i diferente den nan karera musikal. Ta trata aki di dos kantante ku ya kaba ta artistanan renombrá aki na Kòrsou, kual mi a komprondé ku e dos kantantenan aki tabatin kontakto ku Tre’Chic kaba. Pues a resta nos simplemente pa uni forsa i krea un unidat musikal nobo! Un tim di ‘gentlemen’ ku ambishonan grandi i un pashon inkansabel pa krea i presentá bon músika. Mentenan musikal ku ta vibra i a enkontrá otro pa medio di e vishon ku nan ta kompartí. Un banda ku energia nobo ku lo brinda abo, komo amante di bon músika, un eksperensia na nivel. Pa lansa e banda riba merkado nos ta presentá nos promé kansion promoshonal e siman aki na boso, kual ta wòrdu interpretá dor di mi mes persona titulá “Amor sin Final” Damas i kabayeros, humildemente mi ta introdusí na boso…”GENTZ”